¹ Lawitina Asaf. Oh Marobba Allah, yidda kadukka tana da dekegudi dou-Mu. Da padirraka guge Umma-Mu a bisa, mono a pubbukawe Yerusalem. ² Da yayi yidda ata-Mu a mate barrada keila togo langita bada wai pa nga'adi, kana'a da ata-Mu a padieku, barrada a muorika ponnu tana. ³ Da liegadadi ra'ada ata mirrika we'e we barra Yerusalem, mono da'ima lakka iyya ata a tanedi. ⁴ Yamme da wai a dirraka gama ole atama, da pa ulla yidda ata barrama. ⁵ Pirra gai kiapowe mado'i nage, oh Muori? Appa ne kaguola ngau-Mu na wiegarawe mirrika api we ? ⁶ Burriwe ne bani-Mu barrada yidda kadukka tana a idda padde-Gu, mono barrada yidda tokko a idda pa ouguge ngara-Mu. ⁷ Oronage, bada nga'ani Yakub mono da pamodda nage padou madakana. ⁸ Dou lolo kayi yidda sala gu a ulluna, ga'i ne manawara-Mu kana ngettana bada mai, oronage bada parajakama. ⁹ Tulu gama, oh Marobba Allah a tulu gama, oronage sangadina ngara-Mu, pasellama mono tuodi gamadi doku dengama orona ngara-Mu. ¹⁰ Appa yidda kadukka tana maka lidda, 'Gieni Marobba Allahda?' Ga'i ne papabali dadi tubana ra'ada yidda ata-Mu a maliega, pa padde barrada yidda kadukka tana a ne'ena aro matama. ¹¹ Ga'i ne ngi'oda yidda ata pa pattu kana dukkiwe barra-Mu. A linnana ne kaladanage marobba-Mu, pakalikkedi yidda lakawa walina mate dana. ¹² Pa balige barrada ole ata ma pittu wudda togo kuru da, ne makirri da a linna dommona barra-Mu, oh Muori. ¹³ Bage ne yamme, ata-Mu, bebe pa dawa-Mu, ma pamalangi-Wu dukki murri wali murri wali. Ma tekkiwe ne geile tuba-Mu dukki nemmi ya.