¹ Geile papanungana Asaf. Rengewe, ta atagu, tu papadukkigu, patididi katillumu barrana patekkina ngadagu. ² Ku wukkewe ngadagu waige ne tudda, ku tekkiyi yidda kara kidata a walipona nettina, ³ parengeda mono pa paddeda, mono patekki bada inna ama kawiedada barrada. ⁴ Data kabunni mage walina barrada anada, takka ta tekkiwe barrada nemmi wolla murrida yidda geile tubana MUORI, mono kullisa-Na, mono tada-Na parawi-na. ⁵ Oronage, Na padedewe patekkina barrana Yakub, mono na tauyi ukku nee Israel, papatuka-Na barrada inna ama kawieda da, ga'i ka bowoge barrada anada, ⁶ ga'i yidda ata a bo'una kada paddege, yidda anada a idda dadi po, da kedde, mono da tekkiwe barrada anada. ⁷ Da waini Marobba Allah, mono dada denga madi papayilli-Na Marobba Allah, takka da dawayi paparesa-Na. ⁸ Mono, da liddama inna ama kawieda da, ata a bo'una a katto katuowana mono a idda padieku, a idda ienga douna atena, mono diewana dana diekumani Marobba Allah. ⁹ Anana Efraim, na yadi beddila mono busur pana, bada bali ne'e loddo ba patauna. ¹⁰ Dada dawa mawe paparasi-Na Marobba Allah, mono da tullarage bada kako diekuge ukku-Na. ¹¹ Da dengage parawi-Na, mono yidda tada a papa ieta-Na barrada. ¹² Na rawige ne tada aroda inna ama kawiedada, ne'e tana Mesir, ne'e maredda Zoan. ¹³ Na barewe ne bonnu mono Na dutuyi bada palage, mono na padedewe ne we'e mirrika papabuduwe. ¹⁴ Na dutuyi waige kawuta ne'e loddo dana, mono ne gedde waige wiegara api. ¹⁵ Na bokkawe karape watu ne'e maredda tingngi dana, mono na yadi pa ienu a gaina, mirrika a walina bonnu kalada dana. ¹⁶ Na palousoge lai we'e walina watu leita dana, mono na palaiwe mirrika loko we. ¹⁷ Takka, da rawi dommo kiapoge a sala barra-Na, dada waimani A Madieta ne'e maredda tingngi dana. ¹⁸ Ne'e ate danada, da nungaya Marobba Allah, bada dengiya panga'a a linnana pabeida. ¹⁹ Da panewe bada gobbani Marobba Allah, lidda, 'Na dadiwe na Marobba Allah bana yana panga'a ne'e maredda tingngi dana? ²⁰ Oro ba linnawe, Na paluya na watu ga'i kana lousowe we'e a lai, mono ne laina na kaladage. Na padde dommo bana yadi roti , mono kana'a tubada ata-Na?' ²¹ Oro ba linnawe, MUORI na rengewe mono Na bani, api a wiegara na gobbani Yakub, mono banina na keddewe gobbani Israel. ²² Oronage, ba dada waini Marobba Allah, mono dada menne mage manumara-Na. ²³ Takka, Na patukage ne kawuta dieta, mono na wukkewe binna langita. ²⁴ Na yadi manna ga'i kada nga'a, mono na yadi gandum walina togo langita. ²⁵ Na iyya ata na nga'a rotida yidda malaikat, Na pangiddidi panga'a a mangieda barrada. ²⁶ Na pamaiya na paringngi a walina padou oudana mata loddo bana puowi walina togo langita, mono oro kullisa-Na, Na dutuya paringngi selatan. ²⁷ Na yadi kana'a mirrika kobbura mangiedada, mono keila mirrika kuorasayi bonnu dana. ²⁸ Na pakabouladi ne'e tillu kariekada, barra padou madakada. ²⁹ Bage, da nga'a mono da biekuta, oronage bana yadi appa pabeida. ³⁰ Takka, ne ba dada puas oro pabeida, ne ba wa'ipoge ne panga'a ngada danada, ³¹ banina Marobba Allah na keddewe barrada, bage Na pamateyi yidda ata a kullisa barrada, mono parunnuyi yidda ata a bo'u pona ne'e Israel. ³² Walinage ne ngara dukkanage, da rawi poge a sala, mono dada waimadi yidda tada-Na. ³³ Ba linna kowe, Na padukka dadi loddoda ne'e a idda mangu orona, mono dou da ne'e madauta dana. ³⁴ Ne bana pamateyi, da ngaddo-Ya, da bali mono da tarunni bada ngaddoya Marobba Allah. ³⁵ Da lolowe na Marobba Allah ba ngiadona padou addeda, Marobba Allah A Madieta ngiadona a uopiwe doku denga. ³⁶ Takka, da laiku-Ya waige ngadada, mono da makirri barra-Na waige lommada. ³⁷ Ne ateda da ienga doumage barra-Na, dada diekumage paparasi-na. ³⁸ Takka, Marobba Allah, a pamanawara, da uopidadi sala da mono dana pamodda mayi.Na tengngi baliwe bani-Na, mono dana pakedde mayi ngara dukkada bani-Na. ³⁹ Na lolowe ne yidda ba kana'ayi, mirrika paringngi a kako pali mono a idda bali kia. ⁴⁰ Da gobba-Ni ne'e maredda tingngi dana, mona da pamilla nage ate-Na ne'e maredda dana! ⁴¹ Da bali kia bana nungaya Marobba Allah, mona da pamanu'a nage ate-Na A Bisa walina Israel. ⁴² Dada lolomaya limma marobba-Na, mono ne loddo bana keketayi walina barrada kamukada, ⁴³ ne bana yayi yidda tada ne'e Mesir, mono yidda tada-Na ne'e maredda Zoan. ⁴⁴ Na kabaliwe ne lokoda bana dadiwe ra'a, ga'i ka dada ienu kana walina ne lai we'e. ⁴⁵ Na pangiddi dadi yidda kalaluka, a nga'adi, mono kapake na pamoddayi. ⁴⁶ Na yayi yidda pakunnida barrada kabala, mono walina ydda papayillida barrada kabala mangieda. ⁴⁷ Na pubbukayi yidda pu'u wasu anggurda waige urra mayeggela, mono pu'u wasu ara waige we'e penni a pawatuna. ⁴⁸ Na yayi yidda ranga padawa ne'e urra mayeggela dana, mono yidda ranga pakarawada barrana kagurruka. ⁴⁹ Na pangiddi dage ne bani a wiegara, mono mayilla, papangiddina barrana a ngiddiwe pamayilla denga. ⁵⁰ Na palurrusage lara ne bani-Na, dana pattumawe lolo ngauda walina mate dana, takka na yawe muorikada barrana karodduka sampar. ⁵¹ Na pamateyi ngara dukkada ana kawungada ne'e Mesir, dana dadi ullumawe ne'e karieka danana Ham. ⁵² Bage, Na tengiyi ata-Na mirrika bebe yi, mono na dutuyi bada liwe ne maredda tingi mirrika ranga padawayi. ⁵³ Na dutuyi waige a mannangu, ga'i ka dada madauta kana, nage ne we'e bonnu na tuodiyi yidda kamukada. ⁵⁴ Na kododi ne'e tana-Na a bisa, togo letena, parawi douna limma kawana-Na. ⁵⁵ Na wudayi yidda kadukka tana walina aroda, mono na bareyi yidda douda waidi kalerre pa ukura wai, mono kabisu Israel iengadi ne'e karieka danada. ⁵⁶ Takka, Da nungaya mono dada diekumani Marobba Allah A Madieta, mono dada diekumage papalolo-Na. ⁵⁷ Da bali lira mono dada dieku pakitamani a linnana inna ama kawieda da, da sillira mirrika busur ya a mawu. ⁵⁸ Oronage, bada pabani-Ni waige padouda a madieta, mono pakeddenage kaguola ngau-Na waige kasala tou da. ⁵⁹ Ne bana rengewe Marobba Allah, Na bani, Na tullara takkage Israel. ⁶⁰ Na ga'ige tabernakel ne'e Silo, karieka padou madakana barra ata pi'a. ⁶¹ Na yawe kullisa-Na barrada ata a pattu, sangadi-Na barra limmada kamuka. ⁶² Na ya dommoyi ata-Na ne'e beddila dana, mono na bani barrada dou takka-Na. ⁶³ Ne api na nga'adi yidda ata a bo'u pona, lakawa mawinneda dapa deika mayi. ⁶⁴ yidda ratoda da guggila oro beddila, takka yidda mawinne waluna dada ngi'o madi. ⁶⁵ Bage, Muori na kedde walina dura danana, mirrika ata a kullisaya a kawissaka oro a kiddora. ⁶⁶ Na palu pabali lirayi yidda kamuka-Na, Na pamaiwe barrada ne pamakke denga dukki murri wali murri wali. ⁶⁷ Na tullarage kariekana Yusuf, mono dana pede mawe kabisu Efraim. ⁶⁸ Takka, Na pedewe kabisu Yehuda, letena Sion, pamanawara-Na. ⁶⁹ Na pakeddewe padou bisa-Na mirrika langitawe a madieta, tana patallara-Na dukki murri wali murri wali. ⁷⁰ Na pedeya Daud, ata-Na, mono na dekeya walina gollu bebe dana. ⁷¹ Walina ba diekudi yidda bebe a susu po, Na dukkidi, bana dawaya Yakub, ata-Na Israel, dou takka-Na. ⁷² Na dawayi waige ate dessana, mono na dutuyi waidi limmana.