¹ Tubada ata a geile. A linnana: Yedutun. Lawitina Asaf. Li'igu tubana Marobba Allah, kawula nage li'igu tubanage Marobba Allah, mono Na rengewa. ² Ne loddo mayillagu, ku ngaddoya Muori, ne gedde dana limmagu ku wallaradi takka daku samawwulama, diewagu na tullarage ba hibur ya. ³ Ne baku lolya Marobba Allah, dana kadenna mawe ategu. Ne baku pangeddage, na diewagu na bieli. ⁴ Mu torro gadi kaluggu matagu, ku katattaka bage daku paddema panewe. ⁵ Ku pangeddadi loddo patalira, dou a malawi. ⁶ Ku loloya geilegu ne'e gedde dana, ga'i kaku pangeddage ne'e ate danagu, mono diewagu kana ietawe. ⁷ 'Na Muori na tullaraga dukki murri wali murri wali, mono dana bei kiaba gama? ⁸ Appa ne manawara-Na mangu kadukkanage dukki murri wali murri wali? Appa ne paparasi-Na mangu kadukkanage dukki nemmiya? ⁹ Appa Marobba Allah na denga bage bana pamanawara? Appa ne bani-Na na tuodiwe ne manawara-Na?' ¹⁰ Bage luggu, 'Ne ngiadowe milla ategu, na limma kawanana A Madieta bana kabali'. ¹¹ Ku loloyi parawina MUORI. Oh, ku loloyi yidda tada-Mu nettina. ¹² Ku pangeddadi ngara dukkada papayilli-Mu, mono panewedi parawi-Mu. ¹³ Lara-Mu na bisa, oh Marobba Allah. Garrana allah a kaladana a linnana Marobba Allahma? ¹⁴ Yo'u dona Marobba Allah a rawidi yidda tada, Yo'u a tekkiwe marobba-Mu barrada yidda kadukka tana. ¹⁵ Mu keketayi ata-Mu waige lako-Mu, ubbu aibana Yakub mono Yusuf. ¹⁶ Ne we'e na ieta-Wu, oh Marobba Allah. Ne we'e na ieta-Wu, da madauta-Gu, ne bonnu kalada na kadaddaka dommowe. ¹⁷ Ne kawuta makebbela na burriwe we'e, ne kawuta na yawe li'ina, mono yidda ana pana-Mu da liwe. ¹⁸ Li'i kagurruka-Mu na mawoletawe, ne a kidata a pamangiewalawe tana, ne ponnu tana a kadaddakawe mono na giddukawe. ¹⁹ Lara-Mu ne'e bonnu dana, padou li-Mu na liwe ne we'e a kaladana, takka oro wa'i-Mu dapa padde mayi. ²⁰ Mu dutuyi ata-Mu mirrika bebe yi, a liwe limmana Musa mono Harun.