¹ Tubada ata a geile : Waina alat musik petik. Lawitina Asaf. Iyya geile. Ne'e Yehuda, Marobba Allah da paddeni, ngara-Na na kaladage ne'e Israel. ² Karieka-Na ne'e Salem. Padou madaka-Na ne'e letena Sion. ³ Ne'eya, Na patayi ana pana a kidata, tuoda, beddila mono beddila pa patau wai. ⁴ Mu mangiewala, Mu louka pa kaladana walina letena pa ruoti. ⁵ Yidda a idda madauta da pattuyi, da tadanena ne'e dura dana, ngara dukkada ata a kullisa dada kole madadi limmada. ⁶ Oro bani-Mu, oh Marobba Allah Yakub, lakka a kalete mono dara na dura takka. ⁷ Takka You, da madauta-Gu! Garra a dede aro-Mu ne Bou bani ko? ⁸ Walina togo langita, Mu tekkiwe ne paresa, na madautawe tana mono na kadenna, ⁹ Na kedde Marobba Allah bana paresa, mono bana tuludi ngara dukkada ata a mayilla ne ponnu tana. ¹⁰ Ne a linnana, banida yidda ata pi'a da deika-Wu, Mu wai kalerre begge waina ne bani a ienga pona. ¹¹ Parasiwu barrana Muori, Marobba Allahmu, mono ponnuwe! Ga'i ngara dukkada a wa'ina barra-Mu kada ngiddi pataguda tubana Ngia pamadauta. ¹² Na pietadi maringada yidda ata paresa, da madautage yidda tokko ponnu tana.