1
Tubada ata a geile : Waina alat musik petik. Lawitina Asaf. Iyya geile. Ne'e Yehuda, Marobba Allah da paddeni, ngara-Na na kaladage ne'e Israel.
2
Karieka-Na ne'e Salem. Padou madaka-Na ne'e letena Sion.
3
Ne'eya, Na patayi ana pana a kidata, tuoda, beddila mono beddila pa patau wai.
4
Mu mangiewala, Mu louka pa kaladana walina letena pa ruoti.
5
Yidda a idda madauta da pattuyi, da tadanena ne'e dura dana, ngara dukkada ata a kullisa dada kole madadi limmada.
6
Oro bani-Mu, oh Marobba Allah Yakub, lakka a kalete mono dara na dura takka.
7
Takka You, da madauta-Gu! Garra a dede aro-Mu ne Bou bani ko?
8
Walina togo langita, Mu tekkiwe ne paresa, na madautawe tana mono na kadenna,
9
Na kedde Marobba Allah bana paresa, mono bana tuludi ngara dukkada ata a mayilla ne ponnu tana.
10
Ne a linnana, banida yidda ata pi'a da deika-Wu, Mu wai kalerre begge waina ne bani a ienga pona.
11
Parasiwu barrana Muori, Marobba Allahmu, mono ponnuwe! Ga'i ngara dukkada a wa'ina barra-Mu kada ngiddi pataguda tubana Ngia pamadauta.
12
Na pietadi maringada yidda ata paresa, da madautage yidda tokko ponnu tana.