1
Tubada ata a geile : Mono li'i ' Dou pabuttakana'. Lawitina Asaf. Na iyya geile. Ma malangi barra-Mu , oh Marobba Allah, yamme ma malangi, oronage ngara-Mu bana barrawe, ga'i ka tekkiwe ne parawi-Mu a kaladana.
2
'Ne baku pede rapa patekki, Ku paresawe waige a didara.
3
Ne tana mono ngara dukkanage ne'e dana na tobbulawe, Yauwa dona a pakattodi yidda pai'ina.
4
Luggudi yidda a kawossoka, 'Dei kawossoka kana', mono, barrada ata a buokala, 'Dei pamadietakani kadumi'.
5
dei keketakayi kadumi bei pamadietadi, dei panewe kana bei padedeyi bukkumi'.
6
Oronage, ba da walida padou oudana mata loddo mono padou padou tamana mata loddo, mono walina tillu maredda dana ba ammige na a pamadieta.
7
Takka, Marobba Allah ngiadona Ata a Paresa, Ngia a parajakani iyya mono a pamadietadi waddeka.
8
Oronage, ne'e limma danana Muori wa'ini na iyya padou, i na anggur a pawurra, na bonnuna bumbu papakaula, bage Na liegawe. Ne a linnana, ngara dukkada ata a buokala ne'e ponnu tana da passuwe mono da ienuge puosana.
9
Takka, ku tekkiwe dukki murri wali murri wali, ku geileni na geile tubana Marobba Allahna Yakub.
10
Ba linnakowe, ngara dukkada kaduda ata a buokala Na tippukayi, yidda ata a bia Na pamadietadi.