¹ Tubada ata a geile : A linnana Gitit. Lawitina Asaf. Geile tubana Marobba Allah, a pakullisada. Maringami tubana Marobba Allah Yakub. ² Keketaya na geile, waini rebana, kecapi a dessa li'ina waige alat musik. ³ Puowiya kapika ne'e wulla a bo'una, ne bana bonnuna wulla, ne loddo kaladada. ⁴ Oronage, ne ba ngiadowe a bia tubada ata Israel, ne patekkida walina barrana Marobba Allah Yakub. ⁵ Na tekkiwe papoddana barrana Yusuf, ne bana lousona walina tana Mesir. Ku rengewe ne panewe pa dapa paddegu. ⁶ 'Ku kaidi yidda padeitogu togo lakogu, yidda limmada da bebasa walina ne padeito. ⁷ Ne'e mayilla dana mi kawula, mono Ku tulugumi. Ku walemi ne'e padou kabunnina kagurruka, Ku nungngami ne'e we'e Meriba'. ⁸ 'Rengewe, oh ata-Gu, Ku palolo guge, ta Israel, Bei nau ko, Renge-Wa! ⁹ Da'ikana allah a ieka barrami, dei deikana allah pa dapa padde. ¹⁰ Yauwa dona MUORI, Marobba Allahmi, a ngiddimi bei lousona walina tana Mesir. Wukke pakaladage ngadami, mono Ku tauge i na. ¹¹ Takka, yidda ata-Gu dada renge magage li'i-Gu, Israel dada beima-Ga. ¹² Ba linna kowe, Ku yayi ne'e katto ate danada, ga'i kada diekuge pakabbu douda. ¹³ Yidda ata-Gu bada renge kowa, Israel bada nauko kako ne'e lara dana-Gu, ¹⁴ Ku ngettana baku wudayi yidda kamukada, mono Ku kabaliya limma-Gu barrada gobbada. ¹⁵ Yidda a buttu ateni MUORI da akkala bada kawodo barra-Na, mono da wai rapage dukki murri wali murri wali. ¹⁶ Takka, Ku yagumi bei nga'a morru gandum a dessa, waige kanieka walina togo letena, Ku pabiekuta gumi'.