1
Tubada ata a geile : A linnana Gitit. Lawitina Asaf. Geile tubana Marobba Allah, a pakullisada. Maringami tubana Marobba Allah Yakub.
2
Keketaya na geile, waini rebana, kecapi a dessa li'ina waige alat musik.
3
Puowiya kapika ne'e wulla a bo'una, ne bana bonnuna wulla, ne loddo kaladada.
4
Oronage, ne ba ngiadowe a bia tubada ata Israel, ne patekkida walina barrana Marobba Allah Yakub.
5
Na tekkiwe papoddana barrana Yusuf, ne bana lousona walina tana Mesir. Ku rengewe ne panewe pa dapa paddegu.
6
'Ku kaidi yidda padeitogu togo lakogu, yidda limmada da bebasa walina ne padeito.
7
Ne'e mayilla dana mi kawula, mono Ku tulugumi. Ku walemi ne'e padou kabunnina kagurruka, Ku nungngami ne'e we'e Meriba'.
8
'Rengewe, oh ata-Gu, Ku palolo guge, ta Israel, Bei nau ko, Renge-Wa!
9
Da'ikana allah a ieka barrami, dei deikana allah pa dapa padde.
10
Yauwa dona MUORI, Marobba Allahmi, a ngiddimi bei lousona walina tana Mesir. Wukke pakaladage ngadami, mono Ku tauge i na.
11
Takka, yidda ata-Gu dada renge magage li'i-Gu, Israel dada beima-Ga.
12
Ba linna kowe, Ku yayi ne'e katto ate danada, ga'i kada diekuge pakabbu douda.
13
Yidda ata-Gu bada renge kowa, Israel bada nauko kako ne'e lara dana-Gu,
14
Ku ngettana baku wudayi yidda kamukada, mono Ku kabaliya limma-Gu barrada gobbada.
15
Yidda a buttu ateni MUORI da akkala bada kawodo barra-Na, mono da wai rapage dukki murri wali murri wali.
16
Takka, Ku yagumi bei nga'a morru gandum a dessa, waige kanieka walina togo letena, Ku pabiekuta gumi'.