¹ Lawitina Asaf. Linna takkawe, Marobba Allah na dessa ate barrada Israel, barrada yidda a warrasa atena. ² Takka, wa'igu tekki pa tabirrisa, mono pagagu tekki pa tabirrisa dommo. ³ Oronage, baku kaguola ngau dengadi ata a padeika wekkina, baku ietawe poteda ata a buokala. ⁴ Oronage, ba da'ige ne mayilla dukki bada mate, wekkida na morru we. ⁵ Yidda da ne'emadi ne'e mayilla danada ata. Dana wenna mayi a linnana ata waddeka. ⁶ Ba linna kowe, ne padeika wekkina ngiadowe riewa da, pamayilla denga ngiadowe kalabbena. ⁷ Matada da kabullaka oro bada morru, mawo ateda na tobbulawe. ⁸ Da pa ulla mono waige buokalada da tekkiwe ne pamayilla denga, da panewe ne'e kawossoka dana. ⁹ Da wukkewe ngadada bada gobbage langita, mono lommada na kakoge tana. ¹⁰ Ba linna kowe, ata-Na da bali ni'iya, mono ne we'e a bonnuna da palaige barrada. ¹¹ Lidda, 'Pei wa'inage Marobba Allah bana paddege? Appa wa'ige ne padde barrana A Madieta?' ¹² Ne a linnana, ngiadoyi ata a buokala, ata muorika dessa dukki murri wali murri wali, da tabayi poteda. ¹³ Ne a linnana, ne'e a idda mangu orona ku dawawe dessa ategu, mono ku basayi limmagu ne'e idda sala dana. ¹⁴ Oronage, ne iyya loddo ku wennawe, mono da paluwa iyya kabu gedde iyya kabu gedde. ¹⁵ Ba luggu ko, 'Ku panewe luggu wa'ipo', ne a linnana nega a pakalokodi yidda ana-Mu. ¹⁶ Ne baku pangeddage ga'i ka paddege neya, neya na kabaditawe aro matagu. ¹⁷ Dukki baku tama ne'e padou bisana Marobba Allah, bage ku paddege kadukka da. ¹⁸ Ne a linnana, Mu tauyi ne'e padou a tamellusa, Mu paguggiladi ne'e a mubbuka dana. ¹⁹ Dada tebbamana bada modda, da dukka ponguna ne'e mate dana ²⁰ Mirrika kanaga nippi yi na iyya ata bana kedde, oh Muori, ne bana kedde, Mu pamakke dage tou da. ²¹ Ne ategu bana milla kowe, mono wua madalugu da padussukayi. ²² Ku kabanga mono daku paddema. Mirrika rangawa ne'e aro-Mu. ²³ Takka, yauwa ku dieku pakita-Gu. Mu norro gani limma kawana-Gu. ²⁴ Mu dutuwa waige pa bowo-Mu, bage Mu na kodoga barra sangadina. ²⁵ Garra ni padougu ne'e Surga dana? Mono, palolo denga-Gu, da'ima pabeigu ne ponnu tana. ²⁶ Kana'agu mono ategu lakka na dukkage, takka Marobba Allah ngiaka dona padou ategu mono tubagu dukki murri wali murri wali. ²⁷ Oronage ne a linnana, yidda ata a marro walina barra-Mu da modda, Mu pamoddayi ngara dukkada ata a berzina barra-Mu. ²⁸ Takka, ba barrani Marobba Allah na dessawe, ku wai padou mawoni Marobba Allah, ga'i ka tekkiyi ngara dukkada parawi-Na.