¹ Salomo. Ya dadi barrada tokko yidda ukku-Mu, oh Marobba Allah, didara-Mu barrada ana kabani da tokko! ² Ga'i kana paresayi ata-Na waige a bia, mono ata a mayilla waige a didara. ³ Ga'i yidda letena kada ngiddiwe muoli barrada ata, mono ana letena, ne'e didara dana. ⁴ Ga'i kana paresayi ata a milla, tuludi lakawa a milla, mono pubbukayi yidda ata a pamayilla ole ata da. ⁵ Ga'i kada madauta-Gu ba ienga poni na mata loddo mono wulla ne aro, dukki ngara dukkada ubbu aiba. ⁶ Ga'i kana burru mirrika urra ya togo ruta pa tippuka, a linnana urra kalada a pa lammoge tana. ⁷ Ne loddona, ga'i ne a didara kana tubbuwe, mono muoli kana luage dukki ba da'ini na wulla. ⁸ Ga'i kana paresa walina mono dukki bonnu dana, mono walina loko dana dukki uppu tana! ⁹ Ga'i yidda a douge maredda tingngi kada kawodo arona, mono yidda kamuka na kada jalli kobbura. ¹⁰ Ga'i yidda tokko Tarsis mono kalibbo kada yawe pa taguda, yidda tokko Syeba mono Seba kada ngiddiyi pa taguda. ¹¹ Ga'i ngara dukkada tokko kada kawodo arona, ngara dukkada ata kada layani ni! ¹² Oronage, na pasellayi ata a milla a kawula da dengngiwe ba tuludi, ata a milla, mono a da'ina a tuludi. ¹³ Na manawaradi ata a milla mono a dengo, mono lolo ngauda ata a dengo na pamanuwarayi. ¹⁴ Na keketa dadi diewada walina mayilla dana, mono togo matana, ra'a da na pawelli we. ¹⁵ Ga'i kana muorika! Ga'i yidda omma Syeba ka yanadi barrana, ga'i kada sabaya pakita, mono ka pamaringiyi iyya loddo iyya loddo! ¹⁶ Ga'i ka wa'i gandum a mangieda ne'e padou da, togo letena, ga'i yidda wuana kada makidduka mirrika Lebanon, mono ne padou da kana tubbuwe mirrika ruta togo tana. ¹⁷ Ga'i ne ngarana ka ienga douge dukki murri wali murri wali, ne ba paddeni kana ma tabawe ne ba ienga poni mata loddo. Ga'i ka pamaringiyi ngara dukkada kabisu tana waige ngarana, pa tekkida da pamaringini. ¹⁸ Deikaya Muori, Marobba Allah Isarel, a rawige kamiesage ne papayilli a kaladana. ¹⁹ Mono, deikanage ngara-Na a kaladana dukki murri wali murri wali. Ga'i ne sangadi-Na kana ponnuwe ngara dukkanage ponnu tana! Amin mono Amin! ²⁰ Sabaya na Daud, anana Isai, ba bawe.