¹ Barra-Mu, oh Muori, ku ngaddowe padou mawo, dou ga'i kaga bada pamakkewa. ² Ne'e bia dana-Mu, pasellawa mono tuluga, patidiya katillu-Mu barragu mono tuluga. ³ Ku wai padou addegu, padou mai pakitagu, Mu yawe paresa-Mu ga'i kana tuluga, oronage ba Yo'u dona padou mawogu mono padou addegu. ⁴ Tuluga, oh Marobba Allahgu, walina limma danada ata a buokala, walina yidda ata a bani. ⁵ Oronage, Yo'u dona pamennegu, oh Muori Marobba Allah, pa diekugu walipoge baku bo'una. ⁶ Barra-Mu baku adde ne bane poga ti'a dana. Yo'u dona a palousoga walina ti'a danana innagu, yidda geilegu ienga pakitadi barra-Mu. ⁷ Da wai tadaga yidda ata mangieda, takka Yo'u dona padou mawogu a kattona. ⁸ Ne ngadagu na bonnu waige geile-Gu, mono waige sangadi-Mu iyya loddo. ⁹ Dou leto kaga ne baku kawieda ko, dou duddaka kaga ne ba da'i bakoge kullisagu. ¹⁰ Oronage, yidda kamukagu da panewe waiga, yidda a ngaddo gani diewagu da woro dobbage. ¹¹ Lidda, 'Marobba Allah na duddakani. Ruotiya mono yoppaya oronage ba da'i a tuluni'. ¹² Oh Marobba Allah, dou marro kana walina barragu! Oh Marobba Allahgu, ngettana bou tuluga! ¹³ Ga'i yidda ata a padou gage kada makke mono kada modda, ga'i yidda a ngaddowe ne mayillagu ka pa ingiyi waidi pamakke denga. ¹⁴ Takka, yauwa ku menne pakitage mono ku tabawe baku deikawe barra-Mu. ¹⁵ Ne ngadagu na tekkiwe didara-Mu mono manumara-Mu ne iyya loddo, oronage ba daku paddege payiepadi. ¹⁶ Ammiga waige kullisana Marobba Allah, ngiakadowe didara-Mu palologu. ¹⁷ Oh Marobba Allah, Mu bowoga wali poge baku bo'u pona, dukki ne'eya ienga doupo baku tekkiyi yidda parawi-Mu a kaladana. ¹⁸ Bage, dukki baku kawieda mono bana kakage logegu, oh Marobba Allah, dou ga'i kaga, dukki baku tekkiwe marobba-Mu barrada ata a bo'u pona, kullisa-Mu barrada ata a ammina nemmi. ¹⁹ Ne didara-Mu, oh Marobba Allah, ne'e padou a madieta. Mu rawige ne a kaladana, oh Marobba Allah, garra a linna wa'ina Yo'u? ²⁰ Mu patingoge barragu ne mayilla mono a buokala a mangieda, na pamuorika baliwa, keketa baliwa walina tana dana. ²¹ Mu pamangiedadi ne a kaladana, mono mu bieli bou hibur wa. ²² Ku bei dommoge baku deika-Wu waina kecapi oronage ne manawara-Mu, oh Marobba Allahgu, ku geileni na iyya geile tuba-Mu waigr lira, oh A Bisa Israel. ²³ Ro'o wiwwigu na maringawe ne baku geile koni na iyya geile tuba-Mu, linna alla dowe na diewagu pa keketa-Mu. ²⁴ Lommagu na tekki dommowe tubana didara-Mu ne iyya loddo, oronage yidda a beige pamatewa da makke mono da kapippi.