¹ Syidayon Daud pa geilana barrana Muori oronage anana Kush kabisu Benyamin. Oh Muori, Marobba Allahgu, ne'e barra-Mu, padou mawogu. Tuluga walina barrada yidda ata a ruotiwa, pasellawa. ² ga'i ka dada dekegani diewagu mirrika singa ya, na irrawe, mono da'ima lakka iyya ata a padde pasellawa. ³ Oh Muori, Marobba Allahgu, baku rawikoge neya, ba wa'ikoge a idda didara togo limmagu, ⁴ baku pa balikodage a buokala barrana ngia a muoli dengaga, mono a parimana, a wai kamukaga. ⁵ Ga'i yidda kamuka kada ruotiya diewagu mono kada dekeya, mono ga'i kana deke gage muorikagu dukki togo tana, mono kana tauwe ne sangadigu ne'e kobbura dana. Sela ⁶ Kedde, oh Muori, ne'e bani dana-Mu! Dede ka gobbadi yidda kamukagu. Mono, keddewe tubagu. Mu patukage ne a didara barrada. ⁷ Ga'i yidda kadukka tana kada woleta-Gu, mono kana baliwe barrada ne'e padou a madieta. ⁸ Muori na paresayi yidda kadukka tana. Paresawa, oh Muori, waige a bia, mono a walina ate dana. ⁹ Ga'i, buokalada yidda ata a buokala kana dukkage, takka padidarayi yidda ata a bia. Oronage, Marobba Allah na didara, a nungawe ate mono ate ki'i. ¹⁰ Tuodagu ngiadona Marobba Allah, a tuludi yidda ata a lurrusa atena. ¹¹ Marobba Allah ngiadona Hakim a didara, Marobba Allah a bani ne iyya loddo. ¹² Na iyya ata ba dana bali lira ko, Na pa matamage beddila-Na. Na pamawuweu kalerre-Na mono na siap. ¹³ Na siap tuba dou-Na yidda beddila pa mate denga, Na rawidi pana-Na bada wiegara. ¹⁴ Ne a linnana, yidda ata a pati'age a buokala, na pati'age mayilla, mono na pa anage mapodeta. ¹⁵ Na rawige ne kaliena mono na kuodawe, bage na guggila ne'e kaliena dana parawi douna. ¹⁶ Ne parawina na baliwe togo katuowana, ne bainina na burruwe togo ri katuowana. ¹⁷ Ku pamalangiya Muori oronage bana bia, mono ku geileni tubana ngarana Muori A Madieta.