¹ Tubana ata a geile : Lawitina Daud. rengegage li'igu, oh Marobba Allah, baku masali, dawa gage muorikagu walina yidda kamukagu. ² Pa kabunniga walina pakabbuda yidda ata a buokala, walina yidda ata a rawige a buokala, ³ a kuorayi lommada, a linnana beddila. Da pa aroni pana da, panewe a poddu. ⁴ Ga'i kada beddilayi yidda ata a idda sala walina padou a kabunni, da beddilayi ba dada madauta. ⁵ Da norro takkage patekkida a buokala, da tekkiwe pei wa'inage bada kabunnidi yidda sirru, ba lidda, 'Garra a ietayi?' ⁶ Da paresawe ne a idda dessa, ' Ma paresa bawe, kabbuma babawe'. Ne ate ki'ida mono ateda yidda ata na madalege. ⁷ Takka, Marobba Allah na beddilayi walina aro bana waidi pana, da manu'a. ⁸ Ne lommada na pa tabirrisadi, ngara dukkada ata a ietawe da malle. ⁹ Bage, ngara dukkada ata da madauta. Da padukkige appa parawina Marobba Allah, mono da paddege parawi-Na. ¹⁰ Ata a bia da maringa barrana Muori mono da kolege ne mawo barra-Na, mono ngara dukkada a lurrusa atena da maringa dommo.