¹ Lawitina Daud ne baneni tillu maredda dana Yehuda. Oh Marobba Allah, You ngiadona Marobba Allahgu. Ku ngaddo takka pongu-Wu, diewagu na maro'u denga-Gu, ne wekkigu na ridduwe barra-Mu, mirrika tana na a mara mono a marokkota oro bada'i we'e. ² Ku ieta-Wu ne'e padou a bisa, mono ku gillakage ne bisa madi mono sangadi-Mu. ³ Oronage, ne manawara-Mu na louka padessa powe walina ne muorika, ne ro'o wiwwigu na deika-Wu. ⁴ Ba linna kowe, ku deika-Wu na baku muorika po, mono ne'e ngara dana-Mu ku keketaya limmagu. ⁵ Diewagu na puas mirrika morruna mono ina ri, mono ngadagu na deika-Wu waige ro'o wiwwi a maringa. ⁶ Ne baku lolo-Wu togo padou beikagu, ku pangeddagu You ne iyya gedde. ⁷ Oronage, You a tuluga, mono ne'e mawo kapa dana-Mu, ku geile baku maringa. ⁸ Diewagu na kadakka barra-mu, na limma kawana-Mu na rukkawa. ⁹ Takka, yidda a beige pa moddawe lolo ngaugu, da tama ne'e kabu tana dana. ¹⁰ Da yayi kabu beddila, yidda dona panga'ada bogga kadawu. ¹¹ Takka, na tokko na maringa barrana Marobba Allah. Na ata a aura dengage tubana Ngia da dadi ata, oronage ne ngadada ata a tekkiwe a idda linnana da tuodiwe.