¹ Tubada ata a geile : Pa linnana Yedutun. Lawitina Daud. Ngiakadowe barrana Marobba Allah bana mannangu diewagu, Ngiadona manumaragu. ² Ngiakadona padou addegu mono manumaragu, padou mawo a madieta, daku poddamage ne a gidduka kalada. ³ Pirra gai kiapowe mado'i nage ngara dukkami a kawulani na iyya ata, ga'i yemmi kei padde bei pamate, mirrika riddi a kalego mono a tekki pa kaboula? ⁴ Da kabbuge bada wudaya walina padou madi'ina a madieta, da pamaringayi waidi a kabangnga, da yana wee maringi wee malala waidi ngadada, takka ne tekkeda na aurawe. ⁵ Ngiakadowe barrana Marobba Allah bana mannangu diewagu, oronage pamennegu walinage barrana Ngia. ⁶ Ngiakadona padou addegu mono manumaragu, padou mawogu a madieta , yauwa daku giddukama. ⁷ Barrana Marobba Allah, manumaragu mono sangadigu, kullisagu, padou mawogu ngiadona Marobba Allah. ⁸ Wai pakitage barra-Na, ta ata, tekkiwe i atemu aro-Na, Marobba Allah ngiadona padou mawoda. ⁹ Na ana ata pi'a ngau kadoya, ana ata pi'a na kawossoka. ne bada penne ponnu timbangan, da louka saliela walina lolo ngau. ¹⁰ Dei waikadi yidda a pamayilla. Mono, dei taukawe pamennemi barrada a pamarimana. Bana ma tabakoyi yidda doumi, ne atemi dana kadakka kawe barrana. ¹¹ Sadekka, na panewe Marobba Allah, duada wudda ku rengewe, ne sangadina ba dounage Marobba Allah. ¹² Manawara ngiadowe dou-Mu, oh Muori, oronage You bou pabalidage barrada ata a linnana parawida.