¹ Tubada ata a geile : Lawitina Daud. Na geile tuba-Mu ni, oh Marobba Allah, ne'e Sion, mono barra-Mu yidda paparasima ba yayi. ² Oh, You a rengeyi sabaya, barra-Mu ngara dukkadaata bada mai. ³ Ne a sala da marobba barragu, takka You a tuodi gadi sala gu. ⁴ Maringana ata pa pede-Gu mono da barra ga'i kada madaka ne'e umma-Mu! Ga'i yamme kama puas dengngage ne dessa nage umma-Mu, umma-Mu a bisa. ⁵ Mu wale waige a bia pa madauta dengnga, oh Marobba Allah, a tulugama, pa waida ngara dukkada uppu tana mono bonnu a marro. ⁶ Mu padedeyi yidda letena waige kullisa-Mu, mono kalerre begge waige ne kullisa, ⁷ a pakadenna we punni nage we'e bonnu, punni nage ngallungu na mirrika kadukka tanawe a punni. ⁸ Yidda ata a madaka ne'e uppuna da madauta oro tada-Mu, Mu pamaringayi yidda ata kabu gedde mono gedde. ⁹ Mu pa atege ne tana mono Mu ponnuwe, Mu pa potege, ne lainage na bonnuge we'e, Mu yadi gandum, Mu ya takkadi. ¹⁰ Mu ponnuwe lainage, Mu pamadalege ne tana a pakassana. Mu pa dadige waige we'e urra, mono Mu pamaringidi tibbuna. ¹¹ Mu tauge lado ne dou waige a dessa, mono oro-Mu na palaige ne morru. ¹² Ne tana padou dawa ranga maredda dana na laiwe, yidda ata letena da wai kelerre begge waige ne maringada. ¹³ Ne maredda ruta da wai kalabbege yidda bebe. Ne ngaba padedda waige gandum. Da maringa mono da geile.