¹ Tubada ata a geile : Waige geile 'Dou pamoddakawe'. Lawitina Daud ne Saul bana patukadi ata bada dawa nage ummana ga'i ka pamateya. Pasellawa walina barrada kamukagu, oh Marobba Allahgu, tauwa ne'e padou a madieta walina yidda a kedde bada gobba ga. ² Pasellawa walina yidda a rawige a buokala, mono tuluga walina yidda a liega ra'a ata. ³ Oro ne a linnana, da ngaddo gage lolo ngaugu, ata a kullisa da gobba ga, ba da'i kana parawigu mono a sala barragu, oh Muori. ⁴ Oronage, da'ima a sala barragu, da malle mono da siap. Kedde, reggawa mono ietawe! ⁵ You dona, oh Muori, Balatentara na Marobba Allah, Marobba Allahda ata Israel! Kedde ga'i ka paresayi ngara dukkada ata. Dou manawara kadi yidda ata a buokala a makirri. ⁶ Da bali gedde dana, da oula mirrika bogga yi mono da woletage ne padou. ⁷ Ne a linnana, da sibborage waige ngadada, waige beddila ne ro'o wiwwida, oronage ba lidda, 'Garra a renge?' ⁸ Takka, You dona oh Muori, a malikadi, Mu ulladi ngara dukkada ata. ⁹ oh kullisagu, barra-Mu bagu pa atege, oronage Marobba Allah ngiadona padou mawogu a madieta. ¹⁰ Marobba Allahgu, ne'e manawara dana-Mu, Mu reggawa, Marobba Allah na ga'iga baku gillakadi kamukagu. ¹¹ Dou pamate kayi, ka dada dengnga kage yidda atagu, pa boddayi waige marobba-Mu, ngiddiyi kada burru, oh Muori, tuoda ma, ¹² oronage ngadada a sala mono patekkida ro'o wiwwida. Ga'i ka pattuyi ne'e padeika wekki danada, oronage aura da mono ne a idda linnana patekkida. ¹³ padukkayi ne'e bani dana-Mu. Padukkayi dukki ba da'idi, ga'i kada paddege na Marobba Allah a paresaya Yakub dukki uppu tana. ¹⁴ Ne gedde dana da bali, da oula mirrika bogga yi mono da woletage ne padou. ¹⁵ Da kalingngora bada nga'a, mono da taddo ba dada biekuta ko. ¹⁶ Takka, ku beige baku geilege tubana kullisa-Mu. Ku maringa oro manawara-Mu ne kabu gedde. Oronage, You dona pado addegu, mono padou mawogu a madieta ne baku sillira ko. ¹⁷ Oh kullisagu, barra-Mu baku geile, oronage, Marobba Allah oadou mawogu a madieta, Marobba Allah, pa manawaragu.