¹ Tubada ata a geile : A linnana li'i 'Dou pa moddakayi'. Lawitina Daud. Linna takkawe bei tekkiwe a bia, ta ata marobba? Appa mi paresayi yidda ana ata waige a linna takkana? ² Iddama, ne'e ate danami yemmi mi rawige a idda dessa, limma mi da timbanguwe ne bani nage ponnu tana. ³ Ata a buokala da kamiesa ba nepodi taruonga dana, yidda a tekkiwe a idda linnana da sillira ba nepodi ti'a dana. ⁴ Ne wunnu da mirrika wunnu nage nippe, mirrika nippe kawanga a tuodiyi katilluna, ⁵ maka dana rengemawe li'ida yidda ata a pawunnu, mono li'i ata a nobba. ⁶ Oh Marobba Allah, pubbuka dadi ngudduda ne'e ngada danada, patadadi ulleda yidda singa a bo'u pona, oh Muori. ⁷ Ga'idi kada dada mirrika we'eyi a lai. Ga'idi kada mawu mirrika busur a bata. ⁸ Ga'i ka mirrika bukku yi a lai ne bada kako, mirrika lakawa rarra yi a mate walina ti'a dana, a idda poya mata loddo. ⁹ Yidda worrumu ba dada podda poge api mapu dana, Na sapuwe, lakka a muorika po mono a karra. ¹⁰ Ata a bia da maringa ne bada ietawe bada pabalidage, da basayi wa'ina waige ra'ada ata a buokala. ¹¹ Ba linna kowe, lidda yidda ata, 'Ata a bia da wua, Ngiadona Marobba Allah a paresawe ponnu tana!'