¹ Tubada ata a geile : Waige li'i 'Merpati a kabangnga ne'e padou a marro'. Lawitina Daud yidda ata Filistin bada yoppaya ne'e Gat. Manawaraga, oh Marobba Allah, oronage yidda ata bada dekega, iyya loddo da tauwa mono da pamayilla wa. ² Yidda kamukagu da dekeda iyya loddo. Oronage, yidda ata bada gobbaga waige padeika wekkida. ³ Ne baku madauta, ku waigu You. ⁴ Ne barrana Marobba Allah, ne li'i-Na pa deikagu, barana Marobba Allah ku waige, daku madauta ma. Appana parawida ata pi'a barragu? ⁵ Iyya loddo da dawuwe ne palakaragu, pa pangedda da barragu ngiadowe a buokala. ⁶ Da tietiga mono da kabunni, da pa ate gani pagagu, mirrika da mennege ne lolo ngaugu. ⁷ Da manumara walina a buokala dana? ne'e bani dana-Mu, pubbukayi yidda kadukka tana, oh Marobba Allah! ⁸ Mu yiepagadi mayillagu. Tauyi we'e matagu ne'e kantong kalita dana-Mu. Da ne'emadi ne'e kitab dana-Mu? ⁹ Ba linna kowe, yidda kamukagu da bali lira ne loddo baku kawuladi. Ne ngiawe pa paddegu, ngiadona Marobba Allah! ¹⁰ Barrana Marobba Allah, padeikagu li'i-Na, barrana Muori, padeikagu li'i-Na. ¹¹ Barrana Marobba Allah ku waige, daku madautama, appana parawida ata pi'a barragu? ¹² Barragu, oh Marobba Allah, paparasi-Mu. Ku pabalige waige baku pamalangiwu. ¹³ Oronage, Bou tulugani diewagu walina mate dana, na wa'igu dana katullurama, ngia maka ku kako arona Marobba Allah ne'e mangiewala muorika dana.