¹ Tubada ata a geile : Geilena Daud, na Nabi Natan bana mai barrana, ne bana kako palolo dengani Batsyeba. Manawaraga, oh Marobba Allah, a linnana ne manawara-Mu, a linnana ne manawara-Mu a kaladana, uopi gadi sala gu. ² Basawa walina sala danagu, pawarrasa ga walina doku denga danagu. ³ Oronage, ku paddege ne sala gu, mono doku dengan gu ne pakitadi arogu. ⁴ Barra-Mu, You dona, baku sala, mono rawige a buokala a linnana pa ieta-Mu, ga'i Kou bia ne Bou panewe ko, mono warrasa ne Bou ukku kodi. ⁵ Ne a linnana, da pa anaga ne'e sala dana, mono doku denga dana, inna a pati'awa. ⁶ Ne a linnana, Mu beige ne a bia ne'e ate ki'i dana, mono ne a kabunni, Mu yawe ne padde. ⁷ Pawarrasaga waiga hisop ga'i kaku warrasa, basawa ga'i kaku louka kakana walina salju! ⁸ Ga'i kaku rengewa ne maringa. Ga'i yidda rigu pa pata-Mu kada maringa. ⁹ Kabunnige mata-Mu walina barrada sala gu, uopiyi ngara dukkada sala gu. ¹⁰ padadi gage ategu ate a warrasa, oh Marobba Allah, mono pa bo'u gani diewagu ne'e tou danagu. ¹¹ Dou leto kaga walina aro mata-Mu, mono dou deke kagani Ngau Bisa-Mu walina barragu. ¹² Pabali gage ne maringa nage manumara-Mu, mono rukkawa waige diewa a nau takka. ¹³ Ba linna kowe, ku panungadi yidda ata a idda diekuge lara-Mu, mono yidda ata a sala da bali barra-Mu. ¹⁴ Pasellawa walina a liega ra'a ata, oh Marobba Allah, Marobba Allah manumaragu, mono lommagu na maringawe oronage ne bia-Mu. ¹⁵ Oh Muori, wukke gage ro'o wiwwigu, mono ngadagu kana deika-Wu! ¹⁶ Oronage, You ba dou beidi patagu, mono baku beiko yayi, dou beimadi yidda patagu patunnu. ¹⁷ Patagu barrana Marobba Allah ngiadoyi diewa a mubbuka, ate a bata mono maruppuka, oh Marobba Allah, dou hina mayi. ¹⁸ Rawige a dessa a linnana pabei-Mu barrana Sion, padedewe tembok Yerusalem. ¹⁹ Ba linna kowe, Mu beidi yidda patagu a bia, patagu patunnu mono ngara dukkada patagu waddeka, mono sapi mane a bo'una pa ngiddi ponnu kabubbu-Mu.