¹ Geilena Asaf. A Marobbage, Marobba Allah, Muori, na panewe mono na pa ouge tana, walina padou lousona mata loddo dukki bana tama. ² Walina Sion, dessanage, Marobba Allah na wiegara. ³ Marobbba Allahda na mai mono madaka kadenna. Aro-Na ne api na wiegarawe, ne barrana na kapote na kaladana. ⁴ Na kawula barrana langita a madieta, mono barrana tana ga'i kana paresayi ata-Na. ⁵ 'Pakassana ata pamanawara-Gu, a kettege ne paparasi barra-Guu a liwe ne patieba'. ⁶ Ne langita na tekkiwe ne bia-Na, oronage Marobba Allah ba ngiadona Hakim. ⁷ Rengewe, ta ata-Gu, Ku beige baku panewe! Ta ata Israel, Ku beige baku panewe barrami : Yauwa dona Marobba Allah, Marobba Allahmu. ⁸ Ku paresawu da orokinage patiebamu, mono da orokinage patieba patunnumu a wa'i pakitana aro-Gu. ⁹ Daku deke mayi sapi a walina ummamu, mono lakka kamieka mane a walina gollu danamu. ¹⁰ Oronage, yidda ngara dukkada a muorika ne'e kadawu dana ba dou-Gu di, linna alla doyi yidda ranga ne'e togo ana letena. ¹¹ Ku padde kuadi yidda keila togo letena, mono ngara dukkada a kawoddeka ne'e uoma dana ba dou-Gu di. ¹² Baku karieba ko, daku tekki maguge, oronage ne ponnu tana mono ngara dukkanage i nage dou-Gu ge. ¹³ Ku nga'a po kana'a sapi mane, mono ienuge ra'a kamieka mane? ¹⁴ Yanadi barrana Marobba Allah yidda patieba pamalangi wai, mono tauge welli nage ne paparasimu barrana A Madieta A Majaga! ¹⁵ 'Kawula barra-Gu ne bou mayilla ko, ku tuluga, mono ne yo'u mu deika-Wa'. ¹⁶ Takka, barrada ata a buokala linna Marobba Allah, 'Appana tubamu maka mu yiepadi yidda patekki-Gu, mono mu ngiddiyi paparasi-Gu waige ngadamu? ¹⁷ Oronage, ba dei beige ne padde, mono mi letoge li'i-Gu. ¹⁸ Ne bei ieta ko ata kiedu, mi beidi, mono tubamu ngiadowe berzinah. ¹⁹ Mu patukage ngadamu ne'e a buokala dana, mono lommamu na makettewe waige a makirri. ²⁰ Mi madi'i mono panewe bei gobbadi du ole dadimi, ma fitnah douyi anada innami. ²¹ Ne ngara dukkanage mi diekuge, takka Yauwa ku kadenna ngiddiwe, noto ne yauwa limmi dommo yemmi, takka ne'eya Ku tegur mi, mono ku tauwe ne'e aromu. ²² Pangeddage neya, ta yemmi a dengani Marobba Allah, ga' i ka daku irrakami mono da'ima a tulu gumi. ²³ Ba garra koni a yaya patieba na tubana pamalangiina, ngia na deika-Wa. Ba garra koni a diekuge larana, Ku paieta nage ne manumarana Marobba Allah.