¹ Tubada ata a geile : Lawitida anana Korah. Rengewe neya, ngara dukkami kadukka tana. Pa atege, ngara dukkami a douge tana, ² lakka a padaka mono a madieta, lakka ata pote mone a milla, ngara dukkami. ³ Ne ngadagu na tekkiwe padde. Pa pangeddana ategu pa padde dengawe. ⁴ Ku patidi di katillugu barrana na iyya tudda. Ku wukkewe kara kidata waige kecapi. ⁵ Appa maka ku madautawa ne baku mayilla, yidda ata a ruotiwa bada kaworega? ⁶ Yidda a waige kullisada, mono a katadaka dengage poteda a mangieda. ⁷ Da'ima ata a padde keketayi ole atana, dana taumage wellina a tutu barrana Marobba Allah. ⁸ Oronage, ne muorika pa keketa mangu welli nage, mono da'ima kadukkanage dukki murri wali murri wali. ⁹ ga'i kana pakitage muorikana dukki murri wali murri wali, mono ka dana ietakana liangu uodi. ¹⁰ Oronage, bana ietayi yidda ata padde bada mate, ata a kabanga mono ata a jingnga bada modda, mono da duddakadi poteda tubada ata waddeka. ¹¹ Na uodida ngiadowe ummada dukki murri wali murri wali. Padou madakada walina iyya ata a bo'una dukki iyya ata a bo'una. Ne padouda da pangarage waige ngarada. ¹² Takka, ne paakana ata da ienga doumage, yidda mirrika rangayi a modda. ¹³ Ne ngiadowe larada ata a kabanga, mono yidda ata a beidage ngadada. ¹⁴ Mirrika bebe yi, da tauyi ne'e padou ata mate, ne mate ngiadowe ata a dawaya. Yidda ata a bia na paresayi ne kabu gedde. Padou ata mate na pubbu kanage touna, ne'e padou madakana. ¹⁵ Takka, Marobba Allah na keketanani diewana walina padou ata mate. Oronage, Ngia bana deibawa. ¹⁶ Dou madauta kana ne ba wa'iko ata a pote, ne sangadina ummana taba luage. ¹⁷ Oronage, ne bana mate, dana ngiddima lakka appana, sangadina dana burru mawe bana diekuni. ¹⁸ Lakka ne bana muorika, na rerege touna ba pamaringiya, mono lakka ata da deikawu ne bou rawige a dessa. ¹⁹ Takka, na kako ne'e barrada inna ama waikada, dukki murri wali murri wali a idda ietawe ne mangiewala. ²⁰ Yidda ata ne'e katadaka danada dada padde mage, mirrika rangayi a modda.