¹ Tubada ata a geile : Geile papangeddana Daud. Na Doeg ata Edom bana mai tekkinage Saul mono ba linnani 'Daud na kako ne'e ummana Ahimelekh'. Appa maka mi deikawe ne a buokala, ta ata a kullisa? manawarana Marobba Allah wa'i pakitage. ² Ne lommamu na kabbuge pa mubbuka denga, mirrika kieto a tama, mi rawige a mapodeta. ³ Mi louka pabeige a buokala walina a dessa, mono mapodeta walina ba tekkiwe a bia. ⁴ Mi beidi ngara dukkada patekki a idda dessa, ta lomma a mapodeta. ⁵ Takka, Marobba Allah na pubbukawe dukki murri wali murri wali. Na parimage mono Na tengiwu ba lousona walina karieka danamu, mono Na batugu walina ne'e padouda ata a muorika. ⁶ Yidda ata a bia da ietawe mono da madauta, da malikage mono ba lidda, ⁷ 'Ietawe, yidda ata a idda wai Marobba Allahni padou mawoda, takka da waidi yidda poteda a mangieda, mono da kullisa waige ne pabeida a buokala'. ⁸ Takka, ku tubbu mirrika pu'u wasu Zaitun a morona ne'e umma dana-Na Marobba Allah, a wai pakitage manawarana Marobba Allah dukki murri wali murri wali. ⁹ Ku deika-Wu dukki murri wali murri wali oronage ba You a rawige, mono ku riemaguge ngara-Mu, oronage bana dessawe aroda ata a manawara-Gu.