¹ Tubada ata a geile : walina barrada anana Korah a linnana Alamot. Iyya geile.Marobba Allah ngiadona padou mawo mono a kullisa. Ngia takka dona a tuluda bata mayilla ko. ² Ba linna kowe, data madautama lakka ne tana a iekawe, mono yidda letena da gidduka dukki pu bonnu dana, ³ we'e na punniwe mono na pawurrawe, letena da gidduka waige kagurru kanage. ⁴ Ne'eya waige ne iyya loko a lai bana pamaringawe ne padouna Marobba Allah, padou madakana Marobba Allah A Madieta a bisa. ⁵ Marobba Allah wa'ini ne tilluda, dana giddukama, Marobba Allah na tuluni ne kabu gedde ki'i. ⁶ Yidda kadukka tana da bani, ne sangadi da gidduka, Na parengege li'i-Na, ne tana na laiwe. ⁷ Muori Tokko yidda tentara barrada, Marobba Allah Yakub ngiadona padou adde da. ⁸ Ammigu, ietawe ne papayillina Muori, na tauwe a pa mubbuka denga ne ponnu tana. ⁹ Na rawige patau bana dukkiwe ne'e uppu tana. Na pubbukaya busur mono na patawe nobbu. Na tunnuyi yidda kereta waidi api. ¹⁰ 'Kadenna mono paddege ne Yauwa ba Marobba Allahwa, da pamadieta-Wa barra kadukka tana, da pamadieta-Wa ne ponnu tana'. ¹¹ Muori Tokko yidda tentara barrada, Marobba Allah Yakub ngiadona padou adde da.