¹ Tubada ata a geile : Geile paddeda anana Korah. Oh Marobba Allah, ma rengewe waige katillu douma. inna kawieda ama kawiedama da tekki gamage, ne parawi-Mu ne rapada yidda, ne rapa a malawi. ² Yo'u waige limma dou-Mu, Mu batudi kadukka tana, bage Mu taddo balidi. Mu pamayillayi yidda kadukka tana, takka Yo'u a patuka kiadi. ³ Oronage, da oro beddila dou mada, bada douge ne padou. Mono, lakoda dana tulu madi, takka limma kawana-Mu mono lako-Mu, mono mangiewala mata-Mu, oronage Yo'u a beige. ⁴ Yo'u dona Tokkogu, oh Marobba Allahgu, patukage ne manumara barrana Yakub. ⁵ Ma palu pabali liradi yidda kamukama, waige ngara-Mu, ma dekedi yidda a kedde bali. ⁶ Oronage, ba daku waige ne busur gu, lakka beddilagu dana tulu maga. ⁷ Takka, Mu tulugama walina barrada kamukama, mono Mu pamakkeyi yidda ata a idda beigama. ⁸ Barrana Marobba Allah, ma katadaka iyya loddo, mono ma pamalingini tubana ngara-Na dukki murri wali murri wali. ⁹ Takka, Mu tullarage mono Mu pamakke ma, mono dou palolo denga madi yidda pasukan ma. ¹⁰ Mu pabali lirama walina barrada kamukama, mono yidda a idda beigama da parimana. ¹¹ Mu yama mirrika bebe ma panga'a, mono Mu siebama barrada kadukka tana. ¹² Mu battadi ata-Mu waige wellinage a idda tutu, mono idda pa pennege wellina. ¹³ Mu tauma ba panewe waigama barrada ole atama, da ulla gama ne barra ole atama. ¹⁴ Mu ga'i gama bada ulla waigama barrada kadukka tana, a kiddukage katuowada yidda kabisu kadukka tana. ¹⁵ Iyya loddo, ne makkegu wa'ige arogu, mono pamakke denga na kaboro gage matagu, ¹⁶ aroda kamuka mono a dengiwe ba pabali dage, li'ida ata a ulladi mono a hujat yi. ¹⁷ Ne ngara dukkanage na dippalama, takka dama dengama-Gu, mono dama denga mage tubana paparasi-Mu. ¹⁸ Atema dana bali lira mawe, mono pagama dana silliramawe walina lara dana-Mu. ¹⁹ Lakka Mu pubbukama ne'e padou madakada ata kalada bonnu dana, mono Mu pa ingima waige mawo mate dana, ²⁰ bama denga koge ngarana Marobba Allahma, mono bama padiema kodi limmama barrada allah a ieka, ²¹ appa na Marobba Allah dana pa ate kige? Oronage, bana paddege ne a kabunni ate danamu. ²² Takka, tubamu Yo'u, da pamatema iyya loddo, yamme mirrika bebe ma pa ropo. ²³ Kedde! Appa maka mu dura, oh Muori. Pakeddde wekki douna! Dou tullaraka gama dukki murri wali murri wali! ²⁴ Appa maka Mu kabunni mata-Mu, bou dengage mayilla ma? ²⁵ Oronage, diewama bana runnu dukki kobbura dana, mono ti'ama na kadakkawe togo tana. ²⁶ Kedde mono tulu gama! Keketama oro manawara-Mu.