¹ Tubada ata a geile : Iyya geile a walina barrada anana Korah. A linnana rusa a mennege ne laina loko, linna alla dona na diewagu barra-Mu, oh Marobba Allah. ² Na diewagu na maro'o barrana Marobba Allah, Marobba Allah a muorika. Pirra baku mai mono baku ouda arona Marobba Allah? ³ We'e matagu ku wai nga'adi gedde mono loddo, bage iyya loddo liddaga barragu, 'Gieni Marobba Allahmu?' ⁴ Ku lolowe, baku tuddulaya diewagu, ku kako dengadi yidda ata, mono ngangarregu baku sagana ummana Marobba Allah, ku maringa mono ku pamalangiya, dugguda ata a kaworena a urrata. ⁵ Appa makamu moko, ta diewagu, mono mu bani ne'e tou danagu? Menneni Marobba Allah! Oronage, ku pamalangi kiapo-Ni oronage ne manumara barra-Na. ⁶ Oh Marobba Allahgu, na diewagu na kawodo ne'e tou danagu oro baku lolo-Wu, walina tana Yordan, Hermon, mono letena Mizar. ⁷ Ne bonnu kalada na pa ouge bonnu waige kamura nage we'e kajolluka, ngara dukkana a kagurruka mono ngallungu-Mu da wennawa. ⁸ Ne loddo, Muori na patukadi manawara-Na, mono ne gedde dana ne geile-Na wa'di barragu, ne sabaya barrana Marobba Allahgu a muorika. ⁹ Lugguni Marobba Allah, padou addegu, ' Appa maka Mu dengawaga?' Appa maka ku kako baku masali, oro yidda kamukagu? ¹⁰ Mirrika a maduka ne'e ri danagu, yidda kamukagu da ullaga, ne iyya loddo liddaga, 'Gieni Marobba Allahmu?' ¹¹ Appa maka mu moko, ta diewagu, appa maka mu bani? Riemani Marobba Allah! Oronage, baku pamalangiya Marobba Allah oro ne manumara nege aro-Na.