¹ Tubana ata a geile: Geilena Daud. Da pamaringini na ata a padde barrada ata a milla, Muori na tuludi ne'e loddo mayilla. ² Muori na dawawe mono na pakitage muorikana, mono na maringa liddani ne'e ponnu tana, dou siebakayi barrada pabeida kamukana. ³ Muori na pamawo ya ne bana kawula togo padou beikana. Karoddukana Mu kabali kuodadi. ⁴ Luggu, 'Muori, manawaraga, palengaga, oronage baku sala barra-Mu'. ⁵ Yidda kamukagu na panewege a buokala tubagu, 'Pirra bana mate mono bana mollasa?' ⁶ Ne ba ammini bana ietawa, na tekkiwe a idda dessa, atena na tibbuge ne a buokala, ne bana kako bali gounga, na panewege. ⁷ Ngarada a idda beiga da kabutti kana tubagu. Da kabbuge a buokala barragu. ⁸ 'Yidda patekki a idda dessa na yanagi barrana, ne ba neni a beika, dana kedde kiaba'. ⁹ Mono, yidda olegu pa waigu, a nga'a gage rotigu, da keketaya irru wawida bada gobbaga. ¹⁰ Takka You, oh Muori, manawaraga mono pa keddewa, ga'i kaku pabali dage parawida. ¹¹ Ba linna kowe, ku paddege ne You Bou beiga, oronage yidda kamukagu ba dada maringa barragu. ¹² Mu rukkawa oronage baku padieku, Mu tauwa ne'e aro-Mu dukki murri wali murri wali. ¹³ Deikaya Muori, Marobba Allah Israel, dukki murri wali murri wali! Amin mono Amin!