¹ Tubada ata a geile : Geilena Daud. Ku riemani MUORI, bage na bieli bana renge gage kawulagu baku dengiwe ba tuluga. ² Na keketawa walina kaliena a madalena, ba lousona walina rede dana, mono na pattuya wa'igu ne'e togo letena, na pamaddu gadi pagagu. ³ Na yaya iyya geile a bo'una ne'e ngada danagu, na geile tubana Marobba Allahda. Mangieda ata a ietawe mono na madauta, mono na waige barrana Muori. ⁴ Maringana na ata a waini MUORI, a idda bali lira barrada ata a padeika wekkina, mono barrada ata a mapodeta. ⁵ Oh MUORI, Marobba Allahgu, mangieda parawi-Mu, parawi-Mu a kaladana mono pa kabbu-Mu tubama yamme. Da'ima a pamiera dengage dugguda Yo'u, Ku padukkige mono ku tekkiwe barrada, takka da mangieda. ⁶ Kurban mono patagu, dou beimadi. Mu wukke gadi katillugu. Kurban patunnu mono kurban pa uopi wai sala dou dengi mayi. ⁷ Bage, luggu, 'Ieta, ammiga, ne'e surata dana palullu a matulisa tubagu yauwa : ⁸ Ku maringa baku diekuge pabei-Mu, oh Marobba Allahgu, Ukku-Mu wa'ige ne'e tou danagu'. ⁹ Ku tekkiwe li'i a bia ne'e pakassa danana a kaladana. Ietawe, daku pattu mawe ro'o wiwwigu, Mu paddege, oh MUORI. ¹⁰ Daku kabunni mage didara-Mu ne'e ate danagu, ku tekkiwe manawara-Mu mono manumara-Mu, daku kabunni mage manawara-Mu mono a bia walina ata a pakassana. ¹¹ Oh MUORI, dou pattu mawe manawara-Mu barragu, ga'i ne manawara-Mu mono a bia kana dawawa. ¹² Oronage, ne a buokala pa dapa padde ba yiepage a woletaga. Ne sala gu na yoppawa ngia maka daku padde ietawe, mangiedada na louka pa luadi walina loge ponnu katuowa ga'i ne ategu kana ga'iga. ¹³ Beige, oh MUORI, bou tuluga! Oh MUORI, ngettana tuluga! ¹⁴ Ga'i kada makke dobba, da ngaddo gage lolo ngaugu. Ga'i kada bali lira mono ba ulladi, yidda a biege pamayilla dengagu. ¹⁵ Ga'i yidda a karobba oro bada makke, a panewe barragu, 'Poddage, poddage!' ¹⁶ Ga'i ngara dukkada ata a ngaddo-Wu kada maringa mono kada ege ate, ga'i yidda a biege manumara-Mu ka dada ngau kana ba lidda, 'Kaladana MUORI!' ¹⁷ Ku milla mono ku dengo, ga'i Muori kana yiepa gage. A tuluga mono A pamanumarawa. Dou mado'i kana, oh Marobba Allahgu!