¹ Tubada ata a geile : Tubana Yedutun. Geilena Daud. Luggu, 'Ku dawayi laragu, ga'i ka daku rawi kana a sala waige lommagu. Ku dawawe ngadagu waige rasi ne ba wa'i podi ata a buokala arogu'. ² Ku kabangnga mono kadenna, ku pattu wekkina walina dessa dana, mono ne mayillagu a louka kiapowe. ³ Ategu na bangatawe ne'e wekki danagu, ne baku kamussika ko, na wiegarawe api, bage ku panewe waige lommagu, ⁴ 'Oh Muori, tekkigage rapagu, mono rapa muorikagu, ga'i kaku paddege baku modda. ⁵ Ietawe, Mu rawigadi loddogu ba gaiyi tane limma, mono rapagu da'ima arti ge aro-Mu. Ne a linnana, ngara dukkada ata da dede bana tengiwe ngauda. ⁶ Ne a linnana, na ata na kako awa. Ne a linna na, da kamussika a idda dessa dana, da tibbuge ne pote mono dada padde mage, ba garra ko a pakasssadi. ⁷ Mono ne'eya, oh Muori, appana pa riemagu? Pa mennegu wa'ige ne'e barra-Mu. ⁸ Pasellawa walina sala danagu, dou ga'ikaga bada ulla waiga yidda ata a kabangnga. ⁹ Ku kabangnga, daku wukke mawe ngadagu, oronage ba You dou a rawige. ¹⁰ Pamarroga walina ne parawi-Mu, ku dukkana oro limma-Mu a kawukaga. ¹¹ Ne Bou panungana ata waidi bani orona bada sala, Mu padukkayi, a linnana ngengat, appana a welli wali barrana. Ne a linnana, ngara dukkada ata da dede mirrika lolo ngau yi. ¹² Renge gage sabayagu. oh Muori, mono renge gage kawulagu. Dou kadenna ngiddi kawe ne we'e matagu. Oronag ba ata iekawa barra-Mu, na ata a mai, a linnana ngara dukkada inna kawiedami. ¹³ Pa arodi padou ieka ne Bou gillakaga, ga'i kaku maringa ne ba da'iga.