¹ Geilena Daud ga'i ka loloyi. Oh MUORI, dou tegur kawa waige bani-Mu, mono dou ukku kaga waige bani-Mu. ² Oronage, na pana-Mu na dukawa, mono limma-Mu na tenne kaga. ³ Daima a sehat ne'e kana'a danagu oronage bani-Mu, da'ima a sehat ne'e ri danagu oronage sala gu. ⁴ Oronage, ne sala gu bada dippala gage katuowagu, mirrika a buoto, da buoto pongu barragu. ⁵ Ne a manu'a na bowowe mono na nanakawe, oronage baku kabanga. ⁶ Ku moko mono ku runnu, ne iyya loddo ku kako baku masali. ⁷ Oronage, kobbugu na bonnuge malaga api, mono da'ima a karodduka ne'e wekki danagu. ⁸ Na mommawe wekkigu, ku dangu oronage karodduka ategu. ⁹ Oh MUORI, ngara dukkanage pa beigu wa'ige aro-Mu, mono pa poddagu dana kabunni mayi walina barra-Mu. ¹⁰ Ategu na kadukkukawe, kullisagu na duddakaga, mono wiegarada matagu da'i dommo badi. ¹¹ Yidda ata pamanawaragu mono olegu na dede kamiesa walina karoddoka danagu, mono yidda ata a barraga da dede marro. ¹² Yidda a ngaddo gage lolo ngau gu na tauwe sirru da, da beige baku mayilla, da tekkiwe pamubbuka denga, iyya loddo da kabbuge bada makirri. ¹³ Takka, mirrika ata kawanga wa, daku rengema, mirrika ata kabangawa a idda padde wukke we ngadana. ¹⁴ Mirrika ata wa a idda renge, ne'e ngada danana a idda walewe. ¹⁵ Oronage, baku menne-Gu, oh MUORI, Mu walewe, oh MUORI, Marobba Allahgu. ¹⁶ Oronage, ba luggu, 'Dou ga'i kadi bada maringa barragu, a padeika wekkina bada gobbaga, yidda wa'igu bada kadaddaka'. ¹⁷ Oronage, ba ammiga a guggila, mono ne mayillagu wa'i pakitage arogu. ¹⁸ Oronage, baku tekkiwe sala gu, daku kadennama oroda doku dengagu. ¹⁹ Takka, yidda kamukagu da mangieda mono da kullisa, mono yidda ata a idda beiga da taba mangieda ne'e mapodeta dana. ²⁰ Mono, yidda a pabalige a buokala tubana a dessa, da gobbaga, oronage yauwa baku diekuge a dessa. ²¹ Dou ga'i kaga, oh Muori. Oh Marobba Allahgu, dou marro kana walina barragu. ²² Ngettana tuluga, oh MUORI, manumaragu.