1
Tubada ata a geile : waina kecapi. Lawitina Daud. Walewa baku pa oukogu, oh Muori a bia. Mu pasellawa walina mayilla danagu. Manawaraga mono rengewe sabayagu.
2
Ta ana ata, pirra gai kiapowe mado'i nage ne sangadi-Gu bei wai cela ge? Pirra gai kiapowe mado'i nage bei beige ne a idda dessa, mono bei ngaddowe ne a mapodeta?
3
Paddege na Muori bana pakalikke iegadi yidda ata a bia, Muori na rengewe ne baku pa ou-Ni.
4
Kadaddakami, mono dei rawi kiakana a sala; panewemi ne'e ate danami, togo padou beikami mono kadennami.
5
Yaya patagumi a dessa, mono waini Muori.
6
Mangieda ata a linnana, 'Garra a patingoge a dessa barrama?" Ga'i ne mangiewalana Mata-Mu da pamangiewalama.
7
Mu tauwe ne maringa ne'e ate danagu, louka paluage walina gandum mono anggur.
8
Ku beika mono ku dura padessana, oronage Muori, ba You doudona a pakadennawa baku mannangu.