¹ Geilena Daud. Walewe, oh Muori, dugguda yidda a walewa bada gobba ga. Gobba di yidda a gobbaga. ² Pakullisage ne tuoda a kaladana mono tuoda a ki'ina, mono kedde tuluga. ³ Batuge ne nobbu mono lembing ga'i ka gobbadi yidda ata a ruotida. Tekkinage diewagu,'Yauwa dona a pamanumarawu'. ⁴ Ga'i ka pamakkeya mono ka ullani, yidda a ngaddowe ne lolo ngaugu. Ga'i yidda a kabbuge a idda dessa, da bali lira mono da makke. ⁵ Ga'i yidda ka mirrika sekam arona paringi, dugguda malaikat na Muori a pawurruyi. ⁶ Ga'i larada kana kapottana mono tamellusa, dugguda malaikat na Muori a ruotiyi. ⁷ Oronage, pa dapa padde orona da kabunnige ne sirru walina barragu, pa dapa padde orona da kuodawe kaliena rate tubana lolo ngaugu. ⁸ Ga'i ne a mubbuka ka ammige barrada pa dapa pangeddada, mono ga'i ngia dou kana yoppaya ne sirru pakabunni douna. Ga'i kada guggila mono kada mubbuka. ⁹ Ba linna kowe, na diewagu na maringa barrana Muori, na maringa ne'e manumara dana-Na. ¹⁰ Ngara dukkada rigu lidda, 'Garrani a linna wa'ina You, oh Muori, a pasellayi ata a mayilla walina yidda ata a louka pa kullisa, mono yidda ata a mayilla mono a milla walina yidda ata parimana?' ¹¹ Yidda saksi a buokala da kedde, da tuawe ne pa dapa paddegu. ¹² Da pabali gage ne a buokala ponnu nage a dessa, ne diewagu na ngi'o. ¹³ Ne bada karodduka, kalabbegu ingi masali, mono ku parajakani diewagu waige puasa, sabayagu na baliwe ne'e kuru danagu. ¹⁴ Ku kako mirrika tuba dage olegu mono du ole dadigu a karodduka. Ku runnu ne'e milla dana mirrika masaliwe orona innagu. ¹⁵ Takka, ne baku katullura, da maringa mono da pakassana, da pakassa dengadi yidda ata a gobba gama pa dapa padde, a idda ngau bada irrawa. ¹⁶ Mirrika ata munafik a ullaga ne'e urrata dana, da pa giggitadi ngudduda. ¹⁷ Pirra ga'i kiapowe Yo'u bou gillaka gama, Muori? Pamanumara gage diewagu walina yidda ata a beige pamoddawa, yidda dougu, walina barrada singa a bo'una. ¹⁸ Ku beige baku pamalangi-Wu ne'e pakassa danana a kaladana, ku beige baku deika-Wu tilluda ata mangieda. ¹⁹ Dou ga'i kadi yidda ata, yidda kamukagu a mapodeta, bada maringa barragu. Dou ga'i kadi yidda ata a idda beiga pa dapa padde orona, bada kapaddekadi matada. ²⁰ Oronage, ba dada tekkiwe ne muoli, takka da kabbuge ne panewe a makirri tubada yidda ata a muoli ne'e padou. ²¹ Da wukke pakaladage ngadada bada gobbaga mono lidda, ' Poddage, poddage! Mata douma a ietawe!' ²² Mu ieta bawe, oh Muori, Dou kadenna kana. Oh Muori, dou marro kana walina barragu. ²³ Kedde mono dede tubanage ne didaragu mono tubanage ne a dadi, oh Marobba Allah mono Muori gu. ²⁴ Paresawa, oh Muori, Marobba Allahgu, a linnana ne a bia, mono dou ga'i kadi yidda ata bada maringa barragu. ²⁵ Dou ga'ikadi bada panewe ate danada, 'Ha, pa beina diewama!' Dou ga'ikadi ba lidda, 'Ma kabollo bani!'. ²⁶ Ga'i ka pamakkeyi mono kada makke, ngara dukkada a maringa ponnu mayillagu. Ga'i kada waige kalabbe pamakke denga, yidda a pakalada wekkina barragu. ²⁷ Ga'i kada maringa, yidda a beige a bia. Ga'i ka lidda, 'Na kaladana Muori, a beige muoli ata-Na'. ²⁸ Ba linna kowe, ne lommagu na tekkiwe a bia, mono na deika-Wu iyya loddo iyya loddo.