¹ Geilena Daud bana pa iekage touna arona Abimelekh, a wudaya, bage na kako. Ku pamaringini Muori iyya loddo iyya loddo. Ngadagu na deika pakitaya Muori. ² Diewagu na maringa barrana Muori, na ata a dessa ate na rengewe mono na maringa. ³ Deika denga gani Muori, mono maida kata pamadieta dobba nage ngara-Na. ⁴ Ku ngaddoya Muori, bage Na walewa, mono Na pasellawa walina ngara dukkada pamadautagu. ⁵ Yidda ata a gillaka-Ni da kidata, mono matada dana makke mawe. ⁶ Yidda ata a mayilla da pa ouna, Muori na rengeyi, bage na tuludi walina ngara dukkana mayilla da. ⁷ Malaikat na MUORI iengadi barrada yidda ata a madauta-Ni, mono na pasellayi. ⁸ Nungawe mono ietawe na Muori bana dessa! Maringina ata a ngaddowe ne padou mawo ne'e barra-Na! ⁹ Madautani Muori, ta ata a bisa, oronage yidda ata a madauta-Ni da'ima a da'ina. ¹⁰ Yidda singa a bo'una da'ima a wa'idi mono da karieba, takka yidda ata a ngaddoya Muori, da'ima lakka iyya a dessa a kurang. ¹¹ Ammigu, anagu, rengewa, ku panunga gu ba madautani Muori. ¹² Garra a beige muorika, mono a beige ne dou a dessa? ¹³ Pa atege lommamu walina a buokala, mono ro'o wiwwimu walina patekki a mapodeta. ¹⁴ Bielimi walina a buokala, mono rawige a dessa, ngaddowe ne muoli mono ruotiwe. ¹⁵ Matana Muori na arodi yidda ata a bia, mono katillu-Na barrada yidda a dengiwe ba tuludi. ¹⁶ Mata-Na Muori na banidi yidda a rawige a buokala, ga'i ka uopiwe tubada ne ponnu tana. ¹⁷ Da kawula, Muori na rengeyi, mono na pasellayi walina ngara dukkana mayilla. ¹⁸ Muori na barradi ata a bata atena, monno na tuludi yidda ata a mate diewana. ¹⁹ Lua ge mayilla na ata a bia, takka MUORI na pasellayi wali ngarakua. ²⁰ Na pa mawoyi ngara dukkada rina, da'ima lakka iyya laito a bata. ²¹ Ne mayilla na pamateyi ata a buokala, mono yidda ata a idda beina ata a bia da ukkudi. ²² Muori na keketa dadi diewa da ata-Na, mono ngara dukkada ata a ngaddowe ne mawo barra-Na dada sala ma.