¹ Maringami barrana Muori, ta ata a bia! Ne deikami na tubawe barrada ata a bia. ² Malangimi barrana Muori waini kecapi, padukkige barrana Muori waige gambus kabullu kalerre. ³ Geilenage barra-Na a iyya geile a bo'una. tudda padessaya kecapi ne'e maringa dana! ⁴ Oronage, Li'i-Na Muori bana bia we, mono ngara dukkada pa payilli-Na na payilllidi ne'e setia dana. ⁵ Na beige a dessa mono a adil. Ne tana na bonnuge manawarana Muori. ⁶ Oro li'i-Na Muori, langita na dadiwe, mono oro ngau ngada-Na, ngara dukkada ata-Na. ⁷ Na pakassage we'e bonnu ba iyya padouge, Ngia na tauwe ne samudra raya ne'e padounage. ⁸ Ga'i gara dukkanage tana kada madautani Muori, ga'i ngara dukkada ata ponnu tana kada kadaddaka. ⁹ Ngia na panewe, mono na dadiwe, Na pareta, mono ngara dukkanage na dede madduge. ¹⁰ Muori na pangauwe kabbuda yidda kadukka tana, Ngia na pattuwe pakabbuda yidda kabisu kadukka tana. ¹¹ Pa kabbuna Muori iengage dukki murri wali murri wali, kabbu ate-Na walina iyya ata dukki iyya ata. ¹² Maringina yidda kadukka tana a wai Muori ni na Marobba Allah, ata pa pedena bana wai ata a pakitage. ¹³ Muori na gillakana walina Surga dana , Na gillakadi ngara dukkada ana ata pi'a. ¹⁴ Walina padou madi'i-Na, Na pa atedi ngara dukkada a douge ne tana. ¹⁵ Ngia a rawidage ateda yidda ngara dukkada, mono patietige ngara dukkada parawida. ¹⁶ Na tokko dana manumaraki oro bada mangieda atana a kullisa; na iyya pahlawan dapa pasellamaya oro kullisana a kaladana. ¹⁷ Dara ngiadona pamenneda ga'i ka talu, lakka na waige ngara dukka kullisana, dana paddema bana manumara. ¹⁸ Ieta, matana Muori na pa arodi barrada ata a madauta-Ni, barrada ata a mennege manawara-Na, ¹⁹ ga'i ka tuludi diewada walina mate dana, mono ka ienga douge muorikada ne'e karieba dana. ²⁰ Na diewama na riemani Muori. Ngiadona a tulugama mono perisai ma. ²¹ Oronage, atema na maringawe ne'e barrana Ngia, oronage bata waige ne ngara-Na a bisa. ²² Ga'i ne manawara-Mu, oh Muori, ka wa'ige barrama, a linnana bama mennege barra-Mu.