¹ Walina barrana Daud. Geile tubana papanguna. Da maringana ata pa uopida dokuna, pa tuodida salana. ² Maringa ata pa dapa yiepana Muori yidda salana, ne'e diewa danana a da'ina mapodeta. ³ Ne ba nega a pakadenna wekkina, yidda rigu da merana, oro dangugu iyya loddo. ⁴ Oronage, loddo mono gedde, na limma-Mu na pabuotowa, kullisagu na kabaliwe bana dadiwe rapa miera tana a marokota. ⁵ Ku tekkiyi yidda doku dengaku, mono daku kabunni madi yidda salagu. Luggu, 'Ku tekkiyi yidda doku dengagu barrana Muori". Mono, You Mu uopigadi doku dengagu. ⁶ Ba linnakowe, ga'i ngara dukkada ata a bia kada sabaya barra-Mu ne'e ba pareggana. Ne a linnana, ne we'e kalada ba ammige, dana todo mayi. ⁷ You padou mawo-Gu, You Mu dawawa walina sillira dana, You Mu woletaga waige manumara. ⁸ "Ku bowogu mono Ku pa arogu ne'e lara pa limu, Ku bowogu waidi mata-Gu a sagana barramu. ⁹ Da mirrika dara kami mono bagal a idda padde, pa wai kalerre pa pattu wai mono rasi, mono dana barramagu". ¹⁰ Mangiedayi mayillada ata a sala, takka manawarana Muori na woletadi yidda ata a wai-Ni. ¹¹ Maringami barrana Muori, mono maringami, ta yemmi ata a bia, maringami, ta ngara dukkada ata a dessa ata!