¹ Tubada ata a geile : Geilena Daud. Barra-Mu, oh MUORI, ku ngaddowe padou mawo, dou ga'i kaga ba pamakkewa. Tuluga ne'e didara dana-Mu. ² Patidiya katillu-Mu barragu, ngettana tuluga! Ku wai padou mawogu, padou addegu, ga'i kaku manumara. ³ Oronage, Yo'u dona padou addegu mono padou mawogu. Tuba ngara-Mu, Mu dutuwa mono Mu panunga ga. ⁴ Mu palousoga walina sirru dana pakabunni da, oro ba Yo'u dona padou mawogu. ⁵ Ne'e limma dana-Mu, Ku yaya diewagu, Yo'u a pasellawa, oh Muori, Marobba Allah a setia. ⁶ Daku beimadi yidda ata a pa atedi kasala tou pa dapa wai, takka barrana Muori ku waige. ⁷ Ku maringa ne'e manawara dana-Mu, oronage ba Yo'u dona a ietagage mayillagu mono a paddege ne sillirana diewagu. ⁸ Dou ya mawa ne'e limma danada kamukagu, Mu padede gani wa'igu ne'e padou a luara. ⁹ Manawaraga, oh Muori, oronage baku mayilla. Matagu da ba'a oro baku ngi'o, mono diewagu mono tou gu. ¹⁰ Oronage, ne muorikagu na dukkage oro milla ategu, mono yidda dou gu waige keluhan. Kullisagu na bukkage oro sala gu, mono rigu da mawu. ¹¹ Oroda yidda kamukagu, yauwa da ulla waiga, terutama yidda olegu, yauwa da ngeri waiga yidda ata pa paddegu. Yidda a ietawa ne'e lara dana, da kiedu walina barragu. ¹² Da denga baga, mirrika ata matewa, yauwa mirrika perkakas wa a idda dessa. ¹³ Oronage, baku rengewe li'i walina barrada ata mangieda, wa'ige a dadi ne'e ngara dukkanage uppu tana, ne bada beige bada gobbaga, da kabbuge bada dekegage lolo ngaugu. ¹⁴ Takka, ku waige barra-Mu, oh Muori, luggu, 'Yo'u dona Marobba Allahgu'. ¹⁵ Na rapagu nege limma dana-Mu. Pasellawa walina limma danada kamukagu, walina barrada ata a ruotiwa. ¹⁶ Pa kidatage mata-Mu barrana ata-Mu, tuluga ne'e manawara dana-Mu. ¹⁷ Oh MUORI, dou ga'i kaga baku makke, orona baku pa ou-Gu. Ga'i yidda ata a buokala kada makke, ga'i kada burru ne'e padou ata mate, bada kadenna. ¹⁸ Ga'i ne ro'o wiwwi a mapodeta ka kettege, a panewe padeika wekkina barrada ata a bia, waige katadaka mono padeika wekkina. ¹⁹ Na luage dessa-Mu, pa boddala-Mu tubada ata a madauta-Gu, mono Mu yadage yidda ata a ngaddowe padou mawoda barra-Mu, aroda yidda ana ata pi'a. ²⁰ Mu kabunnidi ne'e kabunni dana nage mata-Mu walina parawida ata pi'a. Mu tuludi ne'e karieka dana-Mu walina lomma pa patau denga. ²¹ Maringina Muori oronage bana patingoge manawara-Na a kaladana barragu ne ba ne'ega padou pa kaworeda. ²² Ku panewe ne'e madauta dana, 'Da letoga walina aro Mata-Mu. Takka, Yo'u a renge gage li'igu baku ma dengi ne baku dengiwe ba tuluga walina barra-Mu. ²³ Manawaraga MUORI, ta yemmi a dieku-Ni Muori! Muori na pamawoyi ata a padieku, takka na pabalidage barrada yidda ata padeika wekkina. ²⁴ Pakattoge atemi, ta yemmi ngara dukkami a menneni MUORI!