¹ Geilena Daud. Geile ba padouge ne Umma A Bisa. Ku deikawu, oh Muori, oronage Bou keketawa, mono dou pakaimadi yidda kamukagu bada maringa barragu. ² Oh Muori, Marobba Allahgu, ku kawula barra-Mu, mono Mu palengawa. ³ Oh Muori, Mu keketagani diewagu walina ata mate dana, Mu tulugagge muorikagu, walina barrada a burru ne'e uodi dana. ⁴ Geileni na geile tubana Muori, ta you ata-Na a bisa, pamalangi nage ngara-Na a bisa. ⁵ Oronage, ne bani-Na dana mado'i mawe, takka ne manawara-Na dukki murri wali murri wali. Ne ngi'o na dukkage ni'i gedde, takka ne maringa ammige kabu gedde. ⁶ Ne baku waige, luggu, 'Daku giddu kama'. ⁷ Oh Muori, oro manawara-Mu, Mu pa rawi gage ne letena bana dede madduge, Mu kabunnige mata-Mu, ku katattaka. ⁸ Barra-Mu, oh Muori, baku kawula, barrana Muori, baku dengiwe ne manawara. ⁹ Appa utu nage ne ra'a danagu baku burru ko ne'e uodi dana? Appa ne kobbura na deika-Mu? Appa ngia na padukkige na manawara-Mu? ¹⁰ Rengewe, oh Muori, mono manawaraga! Oh Muori, ku wai-Gu a tuluga. ¹¹ Mu kabaliwe ne masaigu ne'e nego dana. Mu kaikage ne ingi masaligu, mono kette gage kobbugu waige maringa. ¹² Ga'i, ne sangadi kana geileni na geile tuba-Mu mono dana kadennama. Oh Muori, Marobba Allahgu, ku pamalangi-Wu dukki murri wali murri wali.