1
Geilena Daud. Muori ngiadona mangiewala gu mono manumara gu, garra koni pamadauta gu? Muori ngiadona padou mawo nage muorikagu, garra koni pakatattaka dengagu?
2
Yidda ata a buokala bada barraga ga'i ka padukka gage wekkigu, yidda kamukagu, yidda dona a katullura mono a guggila.
3
Lakka yidda pasukan da kaworega bada gobba ga, daku madautama. Lakka ne patauna na keddewe bana gobba ga, takka ienga douge baku waige.
4
Iyya kadona pa dengngigu barrana Muori, pa bei pongugu : ngiadowe madaka ne'e ummana Muori ne loddo muorika gu, ga'i ka ietawe dessana Muori, mono ku ngaddo-Ya ne'e umma-Na.
5
Oronage, ne ba wa'i a buokala, Na kabunniga ne'e karieka dana-Na, Na kabunni ga ne'e padou a kabunnine'e karieka dana-Na, Na keketawa togo letena.
6
Mono ne'eya, ne katuowagu na makeketawe ponnu kamukagu barragu, mono ku yayi patagu gu patieba ne'e karieka dana-Na waige maringa. Ku geile mono lawiti tubana Muori.
7
Rengngewe, oh Muori, ne baku pa ougu waige li'igu, manawaraga mono walewa.
8
'Ngaddowe mata-Gu!', linnawe ategu barra-Mu, 'Ku ngaddowe mata-Mu, oh Muori!'
9
Dou kabunni kage mata-Mu walina barragu. Dou bieli kana walina barra ata-Mu waige bani, oh, You dona a tuluga. Dou wollo waikage mono Dou duddaka kaga, oh Marobba Allah a pamanumarawa!
10
Lakka yidda ama mono innagu bada duddakaga, takka Muori na deibawa.
11
Patingngini lara-Mu, oh Muori, dutuwa ne'e lara dana a rata oro kamukagu.
12
Dou yakawe lolo ngaugu barrada kamukagu, oronage yidda a mapodeta da kedde bada gobba ga, mono da wai lolo ngauge ne bani.
13
Ba idda ko, ku waige baku ietawe dessana Muori, ne'e padouda yidda ata a muorika.
14
Riemani Muori! Kullisami mono ga'i ne ate mi kana madduge! Riemani Muori.