¹ Geilena Daud. Brra-Mu, oh Muori, ku keketaya diewagu. ² Oh Marobba Allahgu, barra-Mu baku waige, dou ga'ikaga bada pamakkewa. Dou ga'ikadi yidda kamukagu bada maringa barragu. ³ Ne a linnana, da'ima ata a riema-Gu pa pamakkeda, yidda a idda waige da pamakkeyi. ⁴ Tekkiwe pata-Mu, oh Muori, bowo gadi yidda lara. ⁵ Dutuwa ne'e a bia dana, mono panungaga. Oronage, You dona Marobba Allah manumaragu, oro-Mu ge , ku riemagu iyya loddo. ⁶ Lolowe manawara-Mu mono padieku-Mu, oh Muori, oronage ne ngara dukkana wa'ibage wali nettina. ⁷ Dou lolo kagadi sala gu baku bo'u pona, mono yidda doku dengagu. A linnana manawara-Mu, lolowa, tubana dessa-Mu, oh Muori. ⁸ Muori na dessa mono na didara, ba linna kowe Na bowoni na lara barrada ata a sala. ⁹ Na dutuyi ata a rajaka waige ukku, mono na bowoya lara-Na barrada ata a rajaka. ¹⁰ Ngara dukkada larana Muori ngiadoyi manawara mono a bia, tubada yidda a norroge patekkina paparasi-Na. ¹¹ Tubanage ngara-Mu, oh Muori, uopi gadi sala gu, oronage na luage sala gu. ¹² Garra ata a madautani Muori? Ngia a patingoni lara pa pedena. ¹³ Diewana na taddo ne'e maringa dana, mono ubbu aibana da douge tana. ¹⁴ Pa panungana Marobba Allah ngiadowe madautani Ngia, mono Na tekkiyi paparasi-Na. ¹⁵ Matagu na gillaka pakitani Muori, oronage Ngia bana palousogani wa'igu walina sirru dana. ¹⁶ Bieliwu barragu mono manawaraga, oronage yauwa kamiesaki mono ku mayilla wa. ¹⁷ Karodduka ategu na taba kaladage, palousoga walina sala danagu. ¹⁸ Ietawe mayillagu, uopi gadi sala gu. ¹⁹ Ietayi, mangiedayi kamukagu. Oronage, da taba mangieda mono dada bei takka maga. ²⁰ Dawa gani diewagu mono tuluga, dou ga'ikadi bada pamakkewa, oronage ku ngaddowe padou mawogu. ²¹ Ga'i ne a pabei mono a bia kana dawawa, oronage baku riema-Gu. ²² Tuludi Israel, walina ngara dukkada mayillada.