1
Tubada ata a geile : Geilena Daud. Semoga MUORI kana walewu ne mayilla danamu. Semoga ngarana Marobba Allah Yakub kana pamadietawu.
2
Semoga kana patukadi a tulugu walina ne'e padou a bisa, mono kana rukkawu walina Sion.
3
Semoga kana lolo-Yi ngara dukkada patagumu, mono kana beidi yidda patieba patunnumu.
4
Semoga kana yawe barramu ngara dukkada pa kabbumu.
5
Ta maringa oronage ne manumaramu, mono ta keketayi bendera waige ngarana Marobba Allahda. Semoga MUORI kana ponnuwe ne padengngida.
6
Ne'eya ku paddege, na MUORI na tuludi yidda ata papede-Na. Na waleyi, wali ne li'i-Na a bisa, waige marobba manumara walina ne'e limma kawan dana-Na.
7
Yidda nobo keretada mono yidda mono darada, takka itta ta lolowe ngarana MUORI, Marobba Allahda.
8
Da kawodo mono da guggila, takka itta ta kedde mono ta dede pamadduna.
9
Oh MUORI, tulunina tokko! Semoga Muori kana walema ne bama kawula-Ni.