¹ Tubada ata a geile : Geilena Daud. Ne langita na tekkiwe ne sangadina Marobba Allah, mono ne cakrawala na padukkide parawina limma-Na. ² Iyya loddo iyya loddo na dukkiwe ne li'i, iyya gedde iyya gedde da patingoge ne padde. ³ Da'ima li'i, da'ima patekki, parenge li'ina. ⁴ Yidda kalerre pa ukura wai dadi da dukki uppu tana, mono patekkida da dukki ne uppu ponnu tana. Ne'e togo langita, na tauwe karieka tubana mata loddo, ⁵ mirrika pengantin kabaniya a lousona walina koro danana, mirrika pahlawan a maringa ne bana malle walina lara dana. ⁶ Na ouda walina uppu langita mono na dukkiwe ne'e uppuna waddeka, da'ima a kabunni walina bangatana. ⁷ Paresana Muori da dessawe, na padessaya diewa. Pa palolona Muori na madduge, wai paddege barrada yidda ata a kabangnga. ⁸ Pa panungana Muori na dessawe, pamaringa ate dengawe. Pa patukana Muori na dessawe, da pamangiewaldi mata. ⁹ Madautani Muori na bisa we, ienga douge dukki murri wali murri wali. Paresana Muori na bia we, mono ngara dukkanage na didarawe, ¹⁰ Na louka pa pawelli powe walina omma, na loukawe omma takka. Mono, na louka paliggisa powe walina madu, mono walina madu a lai walina yobbu danana kaniena. ¹¹ Mono, orona na ata-Mu da palolo nage. Ne bei waige, wa'ige torami a kaladana. ¹² Garra a paddege sala na? Pawarrasawa walina sala gu a kabunni. ¹³ Pattuwa walina padeika wekki danana, da ga'i kadi bada marobba barragu, ga'i ka daku makke kana, mono da warrasa walina parawida a kaladana. ¹⁴ Ga'i patekkina ngadagu mono pa pangeddana ategu, kana tubawe aro-Mu, oh Muori, padou addegu mono a uopiwa.