¹ Tubada ata a geile. Lawitina Daud. Dou kadenna kana, oh Marobba Allah, padeikagu. ² Oronage, ngadada yidda ata a buokala, mono ngadada ata a mapodeta na wukkewe barragu, da panewe barragu waige lomma mapodeta da. ³ Da kaworega waige patekki pa dapa bei, mono da gobba ga idda mangu orona. ⁴ A linnana pa pabali waidage ne manawaragu, da padeito gage, takka ienga douga baku sabaya. ⁵ Da pabalige ne a buokala tubanage dessagu, mono pa dapa bei tubanage manawaragu. ⁶ Pedeya na iyya ata a buokala a gobbani, mono ga'i na iyya ata a paresa kana dede tuba kawanana. ⁷ Ne ba paresaya, ga'i kana lousona walina ne a sala, mono ga'i sabayana ka yiepadi mirrika a sala we. ⁸ Ga'i yidda loddona ka dada mado'ikana, ga'i yidda ata waddeka kada dekewe padouna. ⁹ Ga'i yidda anana kada dadi ana lalo, mono ole ummana kada dadi mawinne walu. ¹⁰ Ga'i yidda anana kada paga mono kada dengi walina ne a mubbuka. ¹¹ Ga'i yidda ata a dengi baliyi ritti kada tauwe sirru barrana a douge, ga'i yidda ata ieka kada parimadi yidda papayillida. ¹² Ga'i ka da'i kana lakka iyya ata a manawarani, ga'i ka wa'i ata a manawara nadi ana lalona. ¹³ Ga'i yidda ubbu aibana ka pamateyi, ngarada ja uopiwe walina ubbu aibada. ¹⁴ Ga'i sala da inna ama kawiedada ka loloyi arona MUORI, mono dou ga'i kadi doku dengana innana ba uopiyi. ¹⁵ Ga'i ka ienga pakitadi arona MUORI, ga'i ka dana lolo kiayi walina ponnu tana. ¹⁶ Oronage, ba dana lolowe bana patingoge a dessa, takka na ruotiyi yidda ata a mayilla, ata a dengo, mono ata a mubbuka atena, dukki bana pamateyi. ¹⁷ Na beige ne aura, ga'i kana wennayi, dana beimage ne kanurru ngia maka na marrowe. ¹⁸ Na wai kalabbege ne aura, ga'i kana tamawe ne'e wekki danada, mirrika we'e mono mirrika minya ne'e rina danana. ¹⁹ Ga'i kana wai kalabbedi a paingiya, wai kalerre beggege pawai pakitana. ²⁰ Ga'i ka pabalige barrada yidda ata a paresawe walina barrana MUORI, mono yidda a panewege a buokala barrana diewagu. ²¹ Takka Yo'u, oh Marobba Allah, Muorigu, palolo dengaga tubanage ngara-Mu, oronage manawara-Mu bana dessawe, pasellawa. ²² Oronage, baku milla mono dengo, mono ategu na manu'awe ne'e tou danagu. ²³ Ku modda mirrika mawo wa a matengi, da kobbasaga a linnana kabala. ²⁴ Yidda kuddogu kadaddaka oro puasa mono wekkigu na kareko we. da'ima morru ge. ²⁵ Yauwa da pamakkewa, ne bada ietawa, da kiddukage katuowada. ²⁶ Tuluga, oh MUORI, Marobba Allahgu, tuluga a linnana ne manawara-Mu. ²⁷ Ga'i kada paddege ne ba ngiadona limma-Mu, Yo'u, oh MUORI, a rawige. ²⁸ Ga'i kada aura, takka Yo'u a pamaringiga, ne bada kedde, da pamakkeyi, takka na ata-Mu na maringa. ²⁹ Ga'i yidda ata a paresawa kada wai kalabbena pamakke denga, mono kada tuodi waina makke a mirrika kalabbena. ³⁰ Waige ngadagu, ku pamalangiya MUORI, ku beige baku deika-Ya ne'e tillu ata mangieda. ³¹ Oronage, bana dede tuba kawanada ata a milla, bana tuludi, walina yidda ata a ukku dadi diewada.