¹ Deikaya MUORI, ta diewagu! Oh MUORI, Marobba Allahgu, Mu kaladana! Mu wai kalabbena sangadi mono pa paakadagu, ² ne tou-Mu da pa ingngiwe waige mangiewala a mirrika kalabbena, a matallara togo langita mirrika karieka na, ³ Na tauyi yidda pari'i-Na ponnu we'e, Na rawige ne kawuta kereta patau-Na, Na kako ne ponnu paringngi, ⁴ Na rawini na paringngi papatuka-Na, yidda pelayan-Na api a wiegara. ⁵ Mu padedewe ne tana ne'e ponnuna, ga'i ka dana gidduka kawe. ⁶ Mu tuodiwe waige bonnu kalada mirrika kalabbe we, na pennewe ne we'e bana loukawe letena. ⁷ Oro kasaka-Mu, da kiedu, oro li'i kagurruka-Mu, da ngettana. ⁸ Ne'e togo letena da penne, ne'e ngaba dana da burru, ne'e padou patekki-Mu di barrada. ⁹ Mu tauya na watte pa dapa lawida, ga'i ka dada bali kana bada tuodiwe tana. ¹⁰ Na palaidi mata we'e ne'e ngaba dana, da lai tillu letena, ¹¹ da yadi paienuda yidda ngara dukkada ranga maredda dana, yidda keledai matobba da puas maro'uda. ¹² ne'e uppuna, yidda keila togo langita da madaka, da punni ne'e togo kasangngada. ¹³ Na burrige ne letena walina dieta, ne tana na pabiekutawe walina wua papayilli-Na. ¹⁴ Na patubbuge ruta tubada yidda ranga, mono a tubbu ga'i kada waidi yidda ata pi'a, ga'i kada kolena panga'a walina tana dana, ¹⁵ mono, anggura ga'i kada maringa waina ate ata. Minya ga'i kana pamangiewala nage matana, mono roti ga'i kana rukka dage ateda ata. ¹⁶ Yidda pu'u wasuna MUORI na pabiekutayi, pu'u wasu aras ne'e Lebanon pataddo-Na. ¹⁷ Ne'eya, padouda yidda keila bada rawige yobbuda, keila ranggung a ummana togo wasu sanobar. ¹⁸ Yidda letena a madieta ngiadoyi tubada kamieka matobba, yidda letena watu tubada kancil. ¹⁹ Na rawini na wulla ga'i kana tekkiya na rapa, mono na mata loddo na paddege rama tamana. ²⁰ Mu rawige na kapotta mono na dadiwe gedde, yidda ranga kadawu dana a daga wa'idi barranage. ²¹ Yidda singa a bo'una da pa oudi panga'ada, mono da ngaddo panga'ada walina barrana Marobba Allah. ²² Ne bana lousona mata loddo, da pakassana, mono da beika ne'e yobbu danada. ²³ Yidda ata pi'a da lousona oro payillida, mono tubana papayillli a buoto dukki mamale. ²⁴ Oh MUORI, na mangieda takkayi papayilli-Mu! Ne'e padde dana, Mu rawidi yidda ngara dukkada, ne tana na bonnuge dou-Mu. ²⁵ Ne ngiadowe bonnu, a kaladana mono a luara, dapa paddema ba yiepadi yidda a kawoddeka ne'e dana, a muorika, lakka a ki'ina mono a kaladana. ²⁶ Ne'eya, yidda tiena da kako, mono Lewiatan, parawi-Mu ga'i kada malengo ne'e dana. ²⁷ Yidda ngara dukkada da riema-Gu, ga'i Kou yadi panga'ada ne rapa nage. ²⁸ Ne Bou yadi, da pakassadi, ne Bou wukkeya limma-Mu, da puas oronage ne a dessa. ²⁹ Ne Bou kabunnige mata-Mu, da katattaka. Ne Bou deke dage lolo ngauda, da mate mono da bali ne'e kobbura dana. ³⁰ Ne Bou patukani diewa-Mu, da marawi, mono Mu pa bo'uge ne ponnu tana. ³¹ Ga'i ne sangadina MUORI ka ienga douge dukki murri wali murri wali, ga'i na MUORI kada maringa ne'e payilli dana-Na. ³² Na gillakana ne'e ponnu tana, mono na kadaddaka, Na todoyi yidda letena, mono da pa mau. ³³ Ku geile tubana MUORI ne a gaina baku muorika, ku lawiti tubana Marobba Allah ne a gaina ba wa'i poga. ³⁴ Ga'i ne papangeddagu kana pamaringa-Ya, mono ku maringa barrana MUORI. ³⁵ Ga'i yidda ata a sala kada modda walina ponnu tana, mono ga'i yidda ata a buokala ka da'i kiakadi! Deikaya MUORI, ta diewagu! Deikaya MUORI!