¹ Lawitina Daud. Deikaya MUORI, ta diewagu! Ne ate ki'igu, deikawe ngara-Na a bisa! ² Deikaya MUORI, ta diewagu, mono dou denga kage ngara dukkada dessa-Na. ³ a uopi gudi ngara dukkada sala mu, a palenga gudi ngara dukkada karoddukamu, ⁴ a deke bali guge muorikamu walina liangu uodi dana, a taugu lado waige manawarana, ⁵ a padessa guge muorikamu waige patau a dessa, ga'i ne rapa bo'una kada baru ge, mirrika keila rajawali. ⁶ MUORI na rawige na a bia mono a didara, tubada ngara dukkada ata a mayilla. ⁷ Na tekkiyi lara-Na barrana Musa, mono parawina barrada ata Israel. ⁸ MUORI na pamanawara mono na dessa ate, dana ngettana bana bani mono na luage manawarana. ⁹ Dana tullara pakita mage, mono dana boddalamawe banina dukki murri wali murri wali. ¹⁰ Dana dieku madadi doku dengada, mono dana pabali madage a linnana ne parawida. ¹¹ Oronage, a linnana madieta nage langita ponnu tana, linna alla dowe kaladanage manawara-Na barrada ata a madauta-Ni. ¹² A linnana marro nage timur dugguda barat, linna alla dowe bana pamarro dadi doku dengada. ¹³ A linnana na paama a manawaradi ana-Na, linna alladowe MUORI na manawaradi yidda ata a madauta-Ni. ¹⁴ Oronage, Na paddege ba rawida, Na lolowe ne itta ba kobbura da. ¹⁵ Oronage yidda ata, loddoda mirrika ruta we. Na wolla mirrika bungaya maredda dana, ¹⁶ takka ba ammini paringngi a wennaya, da'ima bani, mono dapa padde bawe padounage. ¹⁷ Takka, manawarana Muori walina murri wali murri wali dukki murri wali murri wali, barrada ata a madauta-Ni, mono didara-Na tubada ubbu aibada, ¹⁸ tubada yidda ata a karawawe ne paparasi-Na, mono a lolowe yidda ukku-Na. ¹⁹ MUORI na padedewe madi'i-Na ne'e Surga dana, mono sangadi-Na na paresawe wali ngara dukkanage. ²⁰ Deikaya MUORI, ta malaikta-Na, ta yemmi malaikat-Na, yemmi a kullisa ne'e kullisa dana, a diekuge patekki-Na mono ba rengewe li'i patekki-Na. ²¹ Deikaya MUORI, ta ngara dukkami bala tentara-Na, pa yada patagu, a diekuge pabei-Na. ²² Deikaya MUORI, ta ngara dukkami parawi-Na, ne padou marobba-Na! Deikaya MUORI, ta diewagu!