1
Lawitina Daud. Deikaya MUORI, ta diewagu! Ne ate ki'igu, deikawe ngara-Na a bisa!
2
Deikaya MUORI, ta diewagu, mono dou denga kage ngara dukkada dessa-Na.
3
a uopi gudi ngara dukkada sala mu, a palenga gudi ngara dukkada karoddukamu,
4
a deke bali guge muorikamu walina liangu uodi dana, a taugu lado waige manawarana,
5
a padessa guge muorikamu waige patau a dessa, ga'i ne rapa bo'una kada baru ge, mirrika keila rajawali.
6
MUORI na rawige na a bia mono a didara, tubada ngara dukkada ata a mayilla.
7
Na tekkiyi lara-Na barrana Musa, mono parawina barrada ata Israel.
8
MUORI na pamanawara mono na dessa ate, dana ngettana bana bani mono na luage manawarana.
9
Dana tullara pakita mage, mono dana boddalamawe banina dukki murri wali murri wali.
10
Dana dieku madadi doku dengada, mono dana pabali madage a linnana ne parawida.
11
Oronage, a linnana madieta nage langita ponnu tana, linna alla dowe kaladanage manawara-Na barrada ata a madauta-Ni.
12
A linnana marro nage timur dugguda barat, linna alla dowe bana pamarro dadi doku dengada.
13
A linnana na paama a manawaradi ana-Na, linna alladowe MUORI na manawaradi yidda ata a madauta-Ni.
14
Oronage, Na paddege ba rawida, Na lolowe ne itta ba kobbura da.
15
Oronage yidda ata, loddoda mirrika ruta we. Na wolla mirrika bungaya maredda dana,
16
takka ba ammini paringngi a wennaya, da'ima bani, mono dapa padde bawe padounage.
17
Takka, manawarana Muori walina murri wali murri wali dukki murri wali murri wali, barrada ata a madauta-Ni, mono didara-Na tubada ubbu aibada,
18
tubada yidda ata a karawawe ne paparasi-Na, mono a lolowe yidda ukku-Na.
19
MUORI na padedewe madi'i-Na ne'e Surga dana, mono sangadi-Na na paresawe wali ngara dukkanage.
20
Deikaya MUORI, ta malaikta-Na, ta yemmi malaikat-Na, yemmi a kullisa ne'e kullisa dana, a diekuge patekki-Na mono ba rengewe li'i patekki-Na.
21
Deikaya MUORI, ta ngara dukkami bala tentara-Na, pa yada patagu, a diekuge pabei-Na.
22
Deikaya MUORI, ta ngara dukkami parawi-Na, ne padou marobba-Na! Deikaya MUORI, ta diewagu!