¹ Sabayada yidda ata a mayilla ne ba dana kullisa mono bana biege bana tauwe arona MUORI ne mayilla na. Renge gage sabayagu, oh Muori, ga'i ne kawulagu kana dukkiwe barra-Mu. ² Dou kabunni kage mata-Mu walina barragu ne rapa baku mayilla, ne loddo baku kawula, patididi katillu-Mu barragu, ngettana walewa. ³ Oronage, yidda loddogu na dukkadi mirrika mau yi, mono yidda rigu da karrana mirrika api danayi. ⁴ Na pamaluwe ategu mono na marawe mirrika ruta, ngia maka ku dengage baku nga'a rotigu. ⁵ Oronage ne pa poddagu, yidda rigu da kadakka togo kana'agu. ⁶ Mirrika keila pelikan wa ne'e maredda tingngi dana, mirrika keila hantu ne'e barra a mubbuka. ⁷ Ku paddege, ba mirrika keilawa a kamiesa ne'e togo umma. ⁸ Ne iyya loddo, yidda kamukagu da pamakkewa, yidda a padeika wekkina da aura bada gobbaga. ⁹ Oronage, baku nga'a rabuka wai roti ge, mono ku pa kaulage pa ienugu waige ngi'o, ¹⁰ oro bani-Mu mono buttu ate-Mu. Oronage, Bou keketawa mono Bou letoga. ¹¹ Yidda loddogu mirrika mawoyi a matengngi, mono ku marokota mirrika ruta wa. ¹² Takka Yo'u, oh MUORI, a madi'i dukki murri wali murri wali, ne ngara-Mu da lolowe dukki nemmiya. ¹³ Mu kedde mono manawarage Sion. Oronage, rapa a dessa na dukki bawe tubana pamanawara barrada. ¹⁴ Oronage, yidda ata-Mu da beidi yidda watu, mono da manawarage ne kobbura. ¹⁵ Yidda kadukka tana da madautage ngarana MUORI, mono ngara dukkada tokko ponnu tana da madautage sangadi-Mu. ¹⁶ Oronage, MUORI na pakedde bawe Sion, mono na patingoge sangadi-Na. ¹⁷ Na bieli barranage sabayada yidda ata bulus, mono dana parajaka mawe sabayada. ¹⁸ Ga'i kana matulisawe tubada yidda wolla murri nemmiya, ga'i yidda ata parawi dada deikaya MUORI. ¹⁹ Oronage, bana gillakana bawa walina ne'e padou bisa-Na a madieta, walina Surga dana bana gillakage togo tana, ²⁰ ga;i ka rengewe pa poddada yidda ata pa pattu, ga'i ka wukkeyi yidda lakawa pa tekki miema tubanage pamate denga, ²¹ ga'i ka tekkiwe ngarana MUORI ne'e Sion, mono da deika-Ya ne'e Yerusalem, ²² yidda kadukka tana bada pakassa dobbana, mono yidda sangadi, bada deikaya MUORI. ²³ Na pamawwulawe kullisagu ne'e lara dana, Na pakawuddika gage umur gu. ²⁴ Luggu, 'Oh Marobba Allahgu, dou deke kawa ne'e tillu umur gu. Yidda doumu wa'idi dukki nemmiya. ²⁵ Nettina, Mu tauwe ne pu'u tana, ne langita ngiadowe papayillina limma-Mu. ²⁶ Da modda, takka Yo'u ienga dougu a dede. Da katarri mirrika kalabbe yi, mirrika kalabbe yi Mu kabaliyi, mono da kabali. ²⁷ Takka, Yo'u ienga dougu, mono yidda dou u dana dukka madi. ²⁸ Yidda anana ata-Mu da kadenna, mono ubbu aibada da dede aro-Mu.