¹ Pamalangini MUORI, kawulanage ngara-Na, tekkiwe parawi-Na barrada yidda kadukka tana! ² Geilemi tuba-Na, lawitimi tuba-Na, tekkiwe ne ngara dukkanage parawi-Na a kaladana. ³ Deikawe ngara-Na a bisa, ga'i kana maringawe ateda ata a ngaddoya MUORI! ⁴ Ngaddoya MUORI mono kullisa-Na, ngaddo pakitawe mata-Na. ⁵ Lolowe ne a kaladana parawi-Na, yidda tada-Na, mono yidda ukkuna walina ngada dana-Na. ⁶ Ta ubbu aibana Abraham, ata-Na, ta anana Yakub, papede-Na. ⁷ Ngia dona MUORI, Marobba Allahda, yidda ukku-Na ne ponnu tana. ⁸ Na loloyi parasi-Na dukki murri wali murri wali, li'i pa pareta-Na barrada rata wolla murrida, ⁹ pakette-Na dugguda Abraham, ne aura-Na barrana Ishak, ¹⁰ pa pamaddu-Na barrana Yakub pa wai ketetapan , barrada Israel pa wai paparasi pakita, ¹¹ mono lidda, 'Barramu Ku yawe ne tana Kanaan, kou wai douge. ¹² Yidda ata suodikadi, suodi takkakidi, mirrika ata iekayi, ¹³ da kako walina iyya padou da arona iyya padou, walina iyya sangadi da arona ne'e kabisu padou waddeka, ¹⁴ Dana ga'i madi lakka iyya ata a pamayillayi, Na paluyi yidda tokko oroda yidda, ¹⁵ 'Dei todo kayi yidda pa uobara-Gu, dei buokala waikadi yidda ata-Gu!' ¹⁶ Na dippala dage ne karieba barrana ne padou, mono Na pietayi ngara dukkada padou pang'a, ¹⁷ Na patukani na iyya ata bana kako ullu barrada, Yusuf, pa battada a mirrika ata pa anguna. ¹⁸ Da pamanu'a douyi wa'ida waige kalerre, bukkuda da patamage ne'e riewa bessi dana, ¹⁹ dukki ba ammige ne tada-Na, patekkina MUORI na nungaya. ²⁰ Na tokko na patukana ata ga'i ka pasellaya, a marobbage ne kabisu kadukka tana na yadi kaluoga. ²¹ Na wai muorini ne'e ummana, mono na paresa yidda ngara dukkada douna., ²² ga'i ka kettedi yidda ata paresa waidi pabei ateda, mono bowodi ne padde barrada yidda rato. ²³ Bage, Israel da mai ne'e Mesir, Yakub iengani ne'eya mirrika ata iekaya ne'e negeri Ham. ²⁴ Na pamangiedadi ata-Na, mono na louka pakullisadi walina yidda gobbada. ²⁵ Na kabali dadi ateda maka da buttudi ate yidda ata-Na, ga'i kada rawige a idda dessa barrada yidda ata-Na. ²⁶ Na patukani Musa, ata-Na, mono Harun, papede-Na. ²⁷ Da tauyi yidda tada a kaladana barrada, mono ne tada ne'e negeri Ham. ²⁸ Na pangiddige ne kapotta ga'i kana kapottage, mono dada tullaramage ne li'i-Na. ²⁹ Na kabali dage ne we'e da bana dadiwe ra'a, mono na pamate dadi kabokkoda. ³⁰ Ne padouda na kaworege kapake, lakka ne koroda yidda tokkoda. ³¹ Na panewe, bage ammidi yidda kalaluka, mono kariggita wa'idi ne ngara dukkanage padouda. ³² Na paburruni na urra es mirrika urra ya, mono wiegara api ne'e padouda. ³³ Na pukkadi yidda pu'u wasu anggura mono pu'u wasu ara da, mono na patayi yidda pu'u wasu ne'e watte danada. ³⁴ Na panewe, bage yidda kabala da mai, mono yidda kabala takoudaka, dapa paddema ba yiepadi. ³⁵ Da nga'adi ngara dukkada a tubbu ne'e padouda, mono da nga'adi ne pakunnida ne'e tana da. ³⁶ Na pamateyi ngara dukkada ana kawungngada ne'e padouda, mono wua kawungngada walina ngara dukkada kullisada. ³⁷ Bage, Na ngiddiyi bada lousona waige perak mono omma, mono da'ima lakka iyya ata-Na a katullura. ³⁸ Na maringawe ne Mesir oronage bada kako, oronage ne madauta da a dippalayi. ³⁹ Muori na tallarage ne kawuta ba wai tuodige, mono api ga'i kana pamangiewalawe gedde. ⁴⁰ Da dengngi, bage Na pamaiyi yidda puowa, mono Na pabiekutayi waidi roti walina togo langita. ⁴¹ Na wukkewe ne letena watu mono na lousowe we'e, na loko a lai ne'e maredda dana a missi. ⁴² Oronage, Na kettege ne paparasi-Na a bisa, barrada Abraham, ata-Na. ⁴³ Na ngiddiyi yidda ata-Na bada lousona waige maringa, yidda ata papede-Na waige ege ate. ⁴⁴ Na yadage ne padouda yidda kadukka tana barrada, mono da douge ne duolida yidda kabisu tana, ⁴⁵ ga'i kada padde pa karawawe ne patekki-Na, mono kada waige ne ukku-Na. Deikaya MUORI!