¹ Kawalianiaho, morowog, karengan ihoblasan i Ningumêlêd siahu misu ihamotahula, saniaho homotahula, saniaho homotahula mowalad imbatangannu kele powalad ê mênonow, lênas bo mêtênaan be Ningumêlêd; waaho awahêm ibadahnu ê totu’u. ² Na’am komotahula mamoali mêkele i mbao toba ia’i sumata’ momaluyêm i pêtaleyaan ingionu, ahad homotahula dona sumilih bisa papandungên i Ningumêlêd asia ê mauleng mêtênaan a Ningumêlêd bo tolimomod. ³ Besane ambêlês kohomba e mbehomba beahu, siahu kumua a pahasa tow a tutud ihamotahula mangutêh imanga mi’it matatang ênde mêtênaan utêhan ihamotahula, maindo mange hamotahula mahutêh itêna-têna, ahad komotahula mahaimbahut imbatangan kumi’it i kawaheman, embehomba i Ningumêlêd a sosoka apahasa homotahula êsa bo êsa. ⁴ Apaan mêkele-kele êsa watangan ihita tado’o anggota sata’ ahi’i pahasa anggota waaho mêkele tawoiêna, ⁵ kelewaaho hahi mande hahi tado’o awahêm êsa watangan asakum i Kristus; sata’ kita êsa bo êsa awahêm anggota a nêsa bo êsa tow walina. ⁶ Kelewaahom kita bana kohomba mêbawalinaan kumi’it ambêlês kohomba embehomba be hita: sa kohomba iaho tantu manubuat maulêng matulid kumi’it kawaheman i hita. ⁷ Sa kohomba tanu masêlêwir, maulênga hita masêlêwir; sa kohomba tanu masusui maulenga sia masusui; ⁸ sa kohomba tanu masani maulênga sia masani. Sisei imawapêbeteng i nawa-nawa, maulênga sia matulid karêngan i nate ênow; sisei ê mapimpin, maulênga sia tumawoi karêngan indêdêm; sisei maturu koimunan, maulenga sia tumawoi iaho karêngan i kahi. ⁹ mero-merotange bêlês waaho ahi’i tutu’ dumekang a ta’pia bo tumulid i maulêng. ¹⁰ Mero-merotange komotahula mêkahalêsan kele mapog bo mêpawamunaan amasiri. ¹¹ na’am mainjo karêdêmannu kumêsud merotange tutuh-Nu mêlalap ange sumêlêwir si Ngêlêtow. ¹² Mêkahiim a paharawên, mêlud a kahenengan, kumundu a sombayang! ¹³ Owodan ênakaipitan manga totumu’ lênas bo damejin batangannu tanu le’teh mapaehe panupangan! ¹⁴ Kamangênange sisei ê kumulêng ihomotahula, kamangênange kamotahula na’am sumupah! ¹⁵ Mekahiim têka totumu’ ê mêkahi-hahi, bo mêkaeem têka totumu’ mekae-hae! ¹⁶ Mero-merotange kamotahula êsa kawahate, kawautêh asakum pênonowannu wakarua. na’am kamotahula mahuteh i manga perkara matatang, sata’ i helemoho batangannu a manga perkara ê têna’io. ¹⁷ naam mahutêh imbatangannu pandei! Naam mawalas i kata’piaan têka kata’piaan; tulidênange asia maulêng tanu pahasa tow! ¹⁸ Dumameji saniaho behasakêd behow mênonowêm asakum kasononoian têka pahasa tow! ¹⁹ Morowogku kamaulêng naam kamotahula mio tumuntut i pêbawalasan, sata beanange tampa imboro i Ningumêlêd, nde bana iwatih-watih: pêbawalasan waaho awahêm tanu Siahu. Siahu ê mainjo tumuntut i pebalasan, kua i Ngêlêtow. ²⁰ Sata, sa kasarunu maleo beanange sia kan, sasia kawêlaan, beane sia luku’un,! Karêngan itumulid kelewaaho komotahula irumudu tutu imbaha ambao i kohonga. ²¹ Naam komotahula makala andoro i kata’piaan sata, i sêsê kata’piaan têka kamaulêngan!