¹ Yanasa ahu tumaan: Awaonah Ningumêlêd itumulud i mangatow Na? ahi’i mahasa! Apa-apaan siahu mio kahi tow i Israel, a suruh i Abraham, ambala i Benyamin. ² Ningumêlêd ahi’i itumulud i mangatow-Na ê sinisir-Na suma komotahula ahi’i mahailah asia behua i kaol sakum si Elia, atepo sia i mahatau i Israel be Ningumêlêd. ³ Si Ngêlêtow, manga nabi-Nu pinêlimêdêm ilatahula, manga mesbah-Nu bewawawêruum ilatahula; “bati kêmange siahu i nêsa ê mênonowe bo silatahula mabog mubud inasêngku.” ⁴ sata kelembisa kukua i Ningumêlêd be sia? “siahu imêpapemange pitu ngoribu tow tanu Siahu, ê tahi’i mahasa ihumêpah moniri i Baal” ⁵ kelewaahohahi ia’i talewe bana behaêpaange, kumi’it sinisir i mbeles kohomba. ⁶ Sata saniaho ihamoali apaan bêlês kohomba, yanasa alam hahi apaan tatawoi, nde sa tahi’i kelewaaho yanasa bêlês kohomba iaho alahêmoho bêlês kohomba. ⁷ Yanasa kelembisa? Israel ahi’i mahaere asia papêlawêlasêna sata manga totumu’ kina sisiran imahaere iaho. Bo manga totumu’ balina imangêtehêm i natena, ⁸ kele bana iwatih-watih: Ningumêlêd itumulid silatahula behao mololot, imehe bêlên tahu ahi’i melilah, bo talinga tanu hi’i matanga ahad ia’i talewe,” ⁹ bo si Daud iihumua: merotange mamoali sosogow bo pêrangkap, mapawaureng bo papêsombaian tanu silatahula. ¹⁰ Bo merotange bêlên ilatahula mêdêndêm ahad silatahula alam mêlilah, bo tumulid ilihud ilatahula menenet maketud. ¹¹ osa ahu tumaan: awa silatahula mbehawisud bo musti ihasumag?ahi’i mahasa. Tatawoi kalawahan ilatahula, kawiaan behoamatêm a manga bangsa balina, sanioho tumulid silatahula maulêng. ¹² Nde sakalawahan ilatahula, kele kasihaan tanu bao itoba bo kahurangan ilatahula. Kasihaan tanu bangsa walina, lebe-lebe hahi katolimomodan i latahula. ¹³ Si ahu kumua be homotahula ei manga bangsa ahi’i Yahudi. Apa-apaan ahu awahêm rasul tanu manga bangsa ahi’i Yahudi, siahu mautêh iaho konungaan i pêsalianku, ¹⁴ ê waaho nde sa ahu dona mawalêmboh inutêng a suang inate imanga karoongku kumi’it a kêtêd bo dona mawawiah i petahulaan tow besilatahula. ¹⁵ Apa-apaan sa petuludan ilatahula dona ihua kasononoian bao itoba, awa dona pêtirimaan silatahula dona ihua mênonow a tutud toe imatêm?. ¹⁶ Sa roti katare awahêm lênas, yanasa lohow i pinakêmuan kahi lênas, bo sa amud awahêm lenas manga sapah lênas. ¹⁷ Waaho kawalian sa petahulaan sapahnga sinopoom. Bo komotahula luluna silu cinangkokkêm a nepanga bo karua i mahaere beteng a namut i tud zaitun tado’o mbelu, ¹⁸ na’am komotahula monirayo asakum manga sapahnga waaho; sa homotahula monirayo imunên awahem ahi’i homotahula imotung inamut waaho. Sumata’ amut waaho ê mawotung I homotahula. ¹⁹ Mane komotahula kumua: bana manga sapahnga belêkug, saniboho ahu icangkok anêpanga kele salunge. ²⁰ Maulêng! Silatahula belêkuk nde silatahula ahi’i maheman osa komotahula londoloho ê kawaheman. na’am nde kamotahula sukag sumata’ matalo! ²¹ Sata’ sa Ningumêlêd ahi’i mahalês i manga sapah tulen si sia hahi ahi’i mahaês i hamotahula. ²² Sumata’ silatahula hahi maleng I cangkok, sa tahi’i silatahula sumondo io a kawahemanan ilatahula, nde Ningumêlêd mahakawasa tanu maleng cumangkok be silatahula. ^{23 24} Apa-apaan sa kamotahula maleng pinoroh kele sapah itud zaitun silu, bo mahiseaan anggionu iaho kamotahula malengêm becangkok a tud zaitun totu’u lebeh hahi silatahula ia’i, sata’ sa humi’it besilatahula maleng i cankok atud i cangkok atud i zaitun ilatahula mio. ²⁵ Apaan manga morowog, na’am komotahula mangatam batangannu pandei, ihabogku kamotahula mahalah asia niaho nirururu: iwarua i Israel ihumêtehêmmio ahad katadooan imahuhu a manga bangsa walina ê nisumuang. ²⁶ Biboho kawalian pahasa Israel iwawalowid, kele mbewatih: “ a sion moai a penebus; si sia sumaket pahasa katapiaan i Yakub ²⁷ bo waim penandian-Ku teka silatahula, sa ahu mawatala i kaoroan ilatahula”. ²⁸ Sakum kukua silatahula awahêm kasaru i Ningumêlêd apa-apaan kamotahula sata sakum sinisir silatahula awahêm kamaulêng i Ningumêlêd apa-apaan manga nawo. ²⁹ Apa-apan Ningumêlêd manêsêl imbêlês i kohomba bo titiang-Nga. ³⁰ Nde kele mekele ihamotahula a talewe ahi’i maki’it be Ningumêlêd, sata’ ia’i talewe imahaerêm bewêlês atahi’i kohi’itan ilatahula, ³¹ keleaaho hahi silatahula ia’i talewe ahi’i mawaki’it, saniaho tatawoi i kanaeran ilatahula, silatahula hahi mahaêse kobêlêsan. ³² Apaan Ningumêlêd ihumurungên i pahasa totumu’ a tahi’i kohi’itan saniaho sia dona mawaturu kobêlêsana a pahasa silatahula. ³³ O, imeem karalêmênan kasihaan, kaêludan, bo pongitauan i Ningumêlêd! Ulid ahi’i kasilihan manga kaputusan-Na, bo ahi’i mahasa kawêndaman manga dalan-Na. ³⁴ Apa-apaan, siseiêm mahailah i kawahutêh i Ngêlêtow? Suma siseiêm imahasa i mamoali tapahisud’-Na. ³⁵ Suma siseiêm i mahasa imehe asimange be Sia ahad Sia musti sumaol iaho? ³⁶ Apa-apaan asia mange awahem be Sia sa mahi bo tatawoina besia sa mahi, tatawoina be Sia sa mahi, bo tanu si Sia konungaan ahad kaêto-êto.