¹ A pêilahênoho i Yesus ni aho tow tado’o, momao sia a mbao i libuton osa dumatuhoho Sia, mangahi mangamuriNa we Sia. ² Si Yesus kahi molai mohodait bo mapêngajar silatahula, kuaNa: ³ “Maênowange totumu’ ê lêngei a sa’angên i Ningumêlêd apa’an silatahula ê mahasawa i kaholano’an i sorga. ⁴ Maênowange totumu’ ê manape-nape, apa’an silatahula mahi iborên. ⁵ Maênowange totumu’ ê moêmengio’, apa’an silatahula ê mahasawa i mbao i toba. ⁶ Maênowange totumu’ ê male’o wo hawêla’an i kaulitan, apa’an silatahula iwawawêde’. ⁷ Maênowange totumu’ mo’imun natena, apa’an silatahula mahaere koimunan. ⁸ Maênowange totumu’ bayo matena apa’an silatahula mahawilah i Ningumêlêd. ⁹ Maênowange totumu’ mapawasononoi, apa’an silatahula panoton mangawata’ i Ningumêlêd. ¹⁰ Maênowange totumu’ ê kinulêng apa’an i kaulitan, apa’an silatahula ê mahasawa i kaholano’an i sorga. ¹¹ Maênowange homotahula, sa apa’an si-Ahu komotahula sinero’ bo dina’i bo be homotahula tinena’an pahasa ê ta’pia. ¹² Mêkahi’ bo mobeatêm, apa’an lawunu bako’ a sorga, apa’an kelewa’aho pinêda’im manganabi ê na muna i homotahula. ¹³ Komotahula awahêm asin i mbao i toba. Sa niaho nasin mêtêwang, asia malêng mawawo’asin i sia? Alannêmoho torona iwalina nitia’ bo tumidan i tow. ¹⁴ Komotahula awahêm keraw i mbao i toba. Kota iratu-ratuh a mbao i ndungusan ahi’i monah iharuru. ^{15 16} Osahahi totumu’ ahi’i tumutu a sosoloan osa ituli’na a ndalêm i mbatang, sumata’ a mbao i kaki dian mahad ihaheraw i pahasa totumu’ biboho a suang i mbale. Kelewa’ahom merotange kerawnu sumulo a sasa’angên i tow; saniboho silatahula mêlilah i tatwaoinu ê maulêng bo mêdayow i namangu a sorga”. ¹⁷ Na’am komotahula kumatam, awahêm ahu mahi tumala i lala’ut i Torat suma kitab i manganabi. Mahi ahu ahi’i tumala i sia, sumata’ maindo lumêkêw i sia. ¹⁸ Ende aku kumua wehow : kaulitana kaeto’ alawe behatambulala langit bo bao i toba ia’i, sangawis suma sangatitigahe alahêm niwawatala a lala’ut i Torat, satalawe’ pahasa wehamoali. ¹⁹ Wa’aho kawalian sisei ê mawatala i nêsa’an pêreta i lala’ut i Torat mande ni’it i kisitio’, bo masusui helewa’aho a tow walina, sia iharatuh a lesad ni’it oi mbehen a suang i kaholano’an i sorga; sumata’ sisei ê mawatulid bo mawasusui i mangawêreta i lala’ut i Torat, sia iharatuh a lesad matatang a suang i kaholan’an i sorga. ²⁰ Yanasa ihua-hu wehow: sa towan i kaagama’anu ahi’i lebe ulit nde towan i kaaamaan i mangatoutêh i Torat bo mangaparisi, kaulitana homotahula ahi’i ihasuang a suang i kaholano’an i sorga. ²¹ Komotahula itumanga’am ê mbehekua we nawo-nawo’ i hita : Na’ mêlimêd; sisei ê mêlimêd mulit u’kumên. ²² Sumata’ si Ahu kumua wehow: Êsa-êsa ê totumu’ mare’e i pog-nga mulit u’ kumên; sisei ê kumua a pognga : Kaper! Mulit iwêsa’ang ngGohuta i nAgama bo sisei ê kumua : Samêh! Mulid iwêkaroho a suang i naraka kumulu-kulubange. ²³ Apa’an wa’aho sa how mowalad i powala’nu mbao i mesbah bo how mahaimun i nawa-awa ê na suang i nate i pogngu wehow, ²⁴ iêpa’io’ powala’nu a ndior ia’ho mesbah bo moho mêsononoiwe’ bo wogngu, osa sumomba’ i mahi mowalad i aho powala’nu. ²⁵ Tilahomange sumononoi bo hasarunu kaeto’ kow makaru-karuawe’ boo sisia a tutud i ndalan, saniboho niaho kasarununa’ tumaro i how a nggola’tung osa wa’aho nggola’tung tumaro i how a kumaruana osa sihow iwawaruwa’ a torunggu. ²⁶ Si Ahu kumua wehow: kaulitana sihow ahi’i ihaluai wiboho, satalawe’ kow imaer i mbênangu ahad lêkêw. ²⁷ Komotahula itumanga’am i kukua: Na’ mêdêtuh. ²⁸ Sumata si Ahu kumua wehow: Êsa-êsa totumu’ ê tumotong bene osa maewe’ i sia, imêdêtuhêm bo sisia a suang i natena. ²⁹ Yanasa sa bêlênu a kanoal mawaureng i how, su’sun bo itia’am niaho, apa’an lebe maulêng behow sa êsa a nitingan i mbatanganu ndusah nde batanganu iente-enteru iwasotoho a naraka. ³⁰ Bo sa kamanu a kanoal mawaureng i how, powotên bo itia’am niaho apa’an lebe maulêng behow sa êsa a nitingan i mbatanganu ndusah nde mbatanganu mente-enteru sumuang a naraka. ³¹ Bahukuam kahi : Sisei ê mawatared i karoangan mulit mehe surat cere we sia. ³² Sumata’ si Ahu kumua wehow : Êsa’an totumu’ ê mawatared i karoanga songad apa’an nêdetuh, si sia mawawêdêtuh i karoanga; bo sisei ê kumaroang bo wene ê mbewawataradêm, sisia imêdêtuh. ³³ Komotahula itumanga’am kahi ê mbehukua a nawo-nawo’ i hita: Na’ mawasupa towo, sumata’ tikêmên supanu a ndior i Tuhan. ³⁴ Sumata’ si Ahu kumua wehow: Na’am mahasa masupa, maulêng na ngalan i langit, apa’an langit doratuhan i Ningumêlêd, ³⁵ suma a ngalan i mbaoitoba, apa’an baoitoba kohêmbangan i na’e-Na, suma-hahi a ngalan i Yerusalem, apa’an Yerusalem kota i kolana’ bako’; na’am kahi how masupa a ngalan i kohongu, apa’an sihow ahi’i mahasipapa mawasudo’ suma mawawuling i songoiting nutah. ³⁶ sa eyêm, pandungên i homotahula ihua : eyêm; sa ahi’i, pandungên i homotahula ihua: ahi’i. Asia ê nihaleot biboho a pana’pia’an sa mahhi. ³⁷ Komotahula itumanga’am kukua: Bêlên têbus bêlên bo ba’ang têbus ba’ang. Sumata’ si Ahu kumua wehow: Na’am komotahula sumaru i totumu’ itumawoi ta’pia wehow, sumata’ siseiange. ³⁸ Komotahula itumanga’am kukua: Bêlên têbus bêlên bo ba’ang têbus ba’ang. ³⁹ Sumata’ si Ahu kumua wehow: Na’am komotahula sumaru i totumu’ itumawoi ta’pia wehow, sumata’ siseiange sumepe' i piwi hanoalu, iehe-hahi wesia piwi holodinu. ⁴⁰ Bo a totumu' ê mapandung mahata' u i how apa'an maewe' i latangu, iehemange-hahi njuba'ngu. ⁴¹ Bo siseiange lumêse' i how lumapange êsa-mil karekang, lumapangange iwakaruana dua mil karekang. ⁴² Mehe a totumu' ê mangelei wehow bo na'am tumulud i totumu' ê maibog tumombêng behow. hehow bo na'am tumulud i totumu' ê maibog tumobêng behow. ⁴³ Komotahula itumanga'am kukua: ihalêsange kahelenu totumu' bo ihare'e kasehe'nu. ⁴⁴ Sumata' si Ahu kumua wehow: Ihalêsange kasehe'nu bo sumobayangange tanu silatahula nihumulêng i homotahula. ⁴⁵ Apa'an kelewa'aho komotahula maindo bata-wata' i Namangu a sorga, niwawaluai i nêndo tanu tow ta'pia bo tow maulêng bo mawaêkad têka tanu totumu' ulit bo totumu' sea'. ⁴⁶ Sa homotahula mahalês i totumu' mahalês i homotahula, asia ê nupagngu? Hi'indom tapasa'aw i cukai kahi mawakelewa'aho? ⁴⁷ Bo sa homotahula bati-ange mawasiri'i mangawogngu asiam lebena a tinawoi i tow walina? Hi'indom totumu' ahi'i mahahilala i Ningumêlêd kahi mawakelewa'aho? ⁴⁸ Kawalianoho mulitange homotahula tolimonod, kelehahi amangu a sorga awahêm tolimomod.