¹ “Imunên, na’ komotahula tumulid i kawajiban i agamamu a sa’ angên i tow saniboho seren i latahula, ênde sa helewa’ aho, komotahula ahi’ mahaere upag be Namangu a sorga. ² Yanasa sa how mehe wowalad, na’ am kow tumerewa’ sakum wa’ aho, kele pawatulidên i tow kaliut a mangawale pawaibadatan bo a mangalorong, saniboho silatahula dayowên i tow. Si Ahu kumua wehow: Kaulitana silatahula imahaerem i nupa’ nga. ³ Sumata’ sa how mehe wowalad, na’ am kailahan i kama holodinu asia ê tinulid i kama hanoalu. ⁴ Merotoho niaho powala’ nu ihaehe haêtêtêw, yanasa Amangu ê mêlilah i ndumururu mehe bowalas behow.” ⁵ “Bo sa homotahula sumombayang, na’ am sumombayang kele totumu’ kaliut. Silatahula maibog mawapakua i sombayangnga karêngan matod a mangawale waibadatan bo a mangawolenggo’ an i têmbêran, saniboho silatahula seren i tow. Si-Ahu kumua wehow: Kaulitana silatahula imahaerem i nupa’ nga. ⁶ Sumata’ sa how sumombayang, sumuang a suang i kamaru, itakêw mbonang osa sumombayang be Namangu ê na lesad iru-ruru. Yanasa Namangu ê mêlilah i niru-ruru mehewalas behow.” ⁷ Osahi biboho a sombayangu na’ am komotahula melaya-layah kele kanaraman i totumu’ ahi’ i mahahilala i Ningumêlêd. Kuanange i latahula awahêm apa’ an katado’ oan i kodait a sombayangnya do’ na kawonge’ ean. ⁸ Yanasa’ na’ am komotahula hele silatahula, apa’ an Namangu mahailah asia ê pêrêlun i homotahula, atalawe’ komotahula mengelei we-Sia. ⁹ Apa’ an wa’ aho sumombayangange helewa’ i : Amang i hamitahula a kaumbungan, podayowênange ngalan-Nu, ¹⁰ Moaiêm kaholano’ an-U, ihamoalimange pandung-U a mbao i toba kele a kaumbungan. ¹¹ Beanai hamitahula a nêndo inia, kakanên i hamitahula ê niharoro’ ¹² bo apunganai hamitahula a kasea’ an i hamitahula, kele hamitahula hahi imapung a totumu’ imêsea’ behamitahula ¹³ bo’ am mali i hamitahula a pêtena’ an, sumata’ ilopotai hamitahula sakumên i ta’ pia. [Apa’ an Sihowêm ê maha-kaholano’ an bo imbahut bo konungaan ahad i koloko-lokona. Amin.] ¹⁴ Apa’ an sa homotahula mapung i kasea’ an i tow, Amangu a sorga mehe apung behow hahi. ¹⁵ Sumata’ sa homotahula ahi’ i mapung i tow, yanasa Amangu hahi ahi’ i mehe apung a kasea’ anu.” ¹⁶ “Bo sa homotahula mapuasa, na’ am leho tokia’ nu kele totumu’ kaliut. Silatahula malui i nggio i tokia’ na, saniboho tow mêlilah awahêm silatahula mêpua-wuasa. Si Ahu kumua wehow: Kaulitana silatahula imahaerem i nupagnga. ¹⁷ Sumata’ sa homotahula mapuasa, solonange kohongu bo beresin tokia’ nu, ¹⁸ saniboho na’ am pilahêm i tow awahêm kow mêpua-wuasa, sumata’ bati Amangu ê na lesad iru-ruru. Yanasa Amangu ê mêlilah i niru-ruru mehe bowalas behow.” ¹⁹ “Na’ am komotahula mamêsah i narta a mbaoitoba; a mbaoitoba êgat bo ta’ ikayong mêdusah iaho bo totahow mahi mobuhai osa tumahowi’ aho. ²⁰ Sumata’ semêsênêm tanu sihow arta a sorga; a sorga êgat bo ta’ ikayong ahi’ i medusah iaho bo totahow hi’ i mahi mobuhai osa tumahow iaho. ²¹ Apa’ an bisana mbana nartanu, biboho hahi ê natenu. ²² Bêlên awahêm koheraw i mbatangan. Sa bêlênu mauleng, ihaheraw lohow i mbatanganu; ²³ sa bêlênu ta’ pia, dêndêm kahi lolow i mbatanganu. Yanasa sa heraw ê mbehow dendem, me’ e ndêndênga i karêndêman iaho. ²⁴ Ahêm mande êsatow doro’ na mata a ndua awo’. Apa’ an sa hele wa’ aho, dume’ e i nêsa bo mêlês i mbalina, suma sia mceman mata’ u mata be Ningemêlêd bo be mamon.” ²⁵ “Apa’ an wa’ aho Ahu kumua wehow: Na’ am maliang i katowanu, awasia ê kanên i homotahula suma luku’ un, bo ma’ am kahi maliang i mbatanganu, awasia ê latangên i homotahula. Hi’ indom niaho katowan mbanamai torona ênde kakanên bo batangan mbanamai torona ênde latang? ²⁶ Ponarahên mangamelepad a langit, ê tahi’ i mawalulumbo bo ahi’ i mêwênguwu’ bo ahi’ i mawasêsên i mbalun a nggodong, sumata’ pawean kan i namangu a sorga. Hi’ indom komotahula ê ni’ it mana-wana a mangamelepad wa’ aho? ²⁷ Siseiêm a nêsa’ an be how ê napa’ an kaliangana dona mawarohang sangaloasange a tutul i katowana? ²⁸ Bo ndeaho homotahula saliang i latangên? Tu’ tulanange mbungang bakung a mbondoi, ê nitumou hi’ imai matawoi bo hi’ imai makendong, ²⁹ sata’ Ahu kumua wehow: Si Salomo asakum pahasa kasiha’ anamange ahi’ i malatang kele halo’ orang i nêsa’ an a mbungang wa’ aho. ³⁰ Yanasa hele wa’ aho Ningumêlêd imawalo’ or i noho a mbondoi, ê na nêndo inia bana bo sando itia’ a mbaha, ahi’ indom Sia mindo wehawana hahi mawalo’ or i homotahula, ei totumu’ ahi’ i totoh maheman? ³¹ Apa’ an wa’ aho na’ am komotahula maliang bo humua: Asiam ê kanên i hamitahula? ³² Pahasa iaho eren i mangabangsa ê tahi’ i mahahilala i Ningumêlêd. Ta’ sumata’ amangu ê na sorga mahailah, awahêm komotahula mapêta’ ar i pahasa iaho. ³³ Sumata pengereype’ kaholano’ an i Ningumêlêd bo kaulitana, yunasa pahasa iaho iwawarohang behow. ³⁴ Kawalian iaho na’ am komotahula maliang i nêndo sando, apa’ an êndo sando bana kasusaana i nêsa. Kasusaan i sangando tênamio’ tanu sangado.”