¹ Yanasa si Yesus balin i Tutuh moho a padang tolandus tanu wangêpe’an i niblis. ² Osa, mahawogindisoho êpat-nga-wulu’ nga-ndo bo êpat-nga-wulu’ nga-wêngi, a mahad male’om si Yesus. ³ Osa mahi ê niaho tapatena’ osa humua we-Sia: “Sa How Bata’ i Ningumêlêd, pêretanêm saniboho nia’i mangawatu mamoali roti”. ⁴ Sumata sumawot si Yesus : “bana niwati-watih : Totumu’ menonow ahi’i wati’ a roti mange, sumata’ a pahasa kukua i lumuai a mba’ba i Ningumêlêd”. ⁵ Ahad i aho iblis mali i Sia moho a kota suci osa mêpa’ i Sia a mbung i mBale i Ningumêlêd, ⁶ osa humua we Sia: “ Sa how Bata’ i Ningumêlêd, iteleboho mbatangan-U a ndalêm, apa’an bana niwati-watih : A sakum si How pêretaNa mangamalaeka’Na osa silatahula mahi sumambat i How a palad i kamana, saniboho a’e-Nu na’am ihatukui a mbatu”. ⁷ Si Yesus kumua we sia : “Bana hahi niwatih-watih : Na’am kow mangêpe’ si Tuhan, NingumêlêdNu”, ⁸ osa niblis mali i sia hahi a mbao i ndungusan matatangio’ ⁹ osa mawawonarah be Sia: “Pahasa iaho iehehum be-How, sa How sumalimbuhu sumiri’ i ahu” ¹⁰ Yanasa kumuam si Yesus besia : “sumenggot tapatena’! Apa’an bana niwati—watih : Sihow mulit sumiri’ si Tuhan, NingumêlêdNu, osa bati be Sia mange how mabakti!” ¹¹ Osa si tapatena’ mêpa’ange i Sia, bo seren, mangamalaekat mahi mongimoh si Yesus. ¹² Sumata’ a katanga’anoho i Yesus, awahêm si Yohanes tiniho’om, kumêndusoho Sia a ngGalilea. ¹³ Mêpa’ange Sia i Nazaret osa mêtêwio’ a Kapernaum a sili’ i luah, a lukad i Zebulon bo si Naftali, ¹⁴ aniboho lêkêwêm kukua mbehua i nabi Yesaya: ¹⁵ “Tana’ i Zebulon bo tana’ i Naftali, têmbêran moho a saloyon, tapirig i na tetela’ i londola Yordan, Galilea, lukad i mangabangsa walina, ¹⁶ bangsa ê mênonow a karêndêman, imêilahêm i keraw bako’ osa tanu silatahula imututun a ndo’ong uyu-uyungên i pawate, i lumêmbom keraw”. ¹⁷ Tu’os tepo i aho si Yesus masahai : matobatêm ende kaholano’an i sorga susutêm!” ¹⁸ Osa a mêlapa-lapang si Yesus matapirig i luah Galilea, mêlilah Sia dua tow mapog, awa’aho si Simon êpatoton Petrus, bo si Andreas, pog-nga. Silandua samantara malolombo a luah, apa’an silandua tapalolombo’ i nda’. ¹⁹ Si Yesus kumua we silandua : “Ayom, lumasêm i-Ahu, bo komondua indoy-Ku tapalolombo’ i totumu’ ²⁰ osa silandua hahi tilaho i mêpa’ange i lolombo’na bo mahalas i Sia. ²¹ Osa ihaworusoho wiboho Sia belilaNga hahi dua tow mapog, awa’aho si Yakobus bata’ i Zebedeus bo si Yohanes pog-nga, karuru i namang i landua, Zebedeus, mawu’tu-wu’tul i lolombo’ a suang i mbolutu. Si Yesus tumiang si landua, ²² osa silandua tilahom imêpa’ange i mbolutu bo amanga, osa mahalas i Sia. ²³ Si Yesus kahi makêkêd a sêrêb i ngGalilea; si Sia mapêngajar a mangawale waibadatan bo masahai i Kukua i kaholanoan i Ningumêlêd teka mapawatala i pahasa mahados bo kahawelan a tutud aho mbangsa. ²⁴ Yanasa beharerem sahai sakum si-Sia a sêrêb i Siria osa binalimai pahasa totumu’ ta’pia paela, ê mahigon i moromahados bo dorot, ê papongaluman, ê mboringongotên bo ndupende, osa si Yesus imawamaulêng silatahula. ²⁵ Yanasa tow tado’o malulu-lulut i Sia. Silatahula a ngGalilea wo Dekapolis sa mahi, bo a Yerusalem bo Yudea bo a tetela’ i Yordan.