¹ Atepo wa’aho si Yohanes pembaptis tumod a padang tolandus i Yudea osa sumahai: ² “Tumobatêm, ênde kaholano’an i sorga susutêm!” ³ kaulitana si Siam ê mbewanutu’ i nabi Yesaya a kakuana: “Bana nunu’ i totumu’ mane-nerewa’ a padang tolandus: Elurênêm ndalan tanu si Tuhan ; londolênêm ndalan tanu si Sia”. ⁴ Si Yohanes malatang jubah bul i unta wokol bolulang, bo pakanêna borit bo biluh a talun. ⁵ Yanasa mahi we sia mangatow i Yerusalem, a kêsan i Yudea bo a kêsan i lukad tapirig i Yordan. ⁶ Osa karêngan i monge’e i sea’na silatahula binaptis i Yohanes a londola i Yordan. ⁷ Sumata’a milah sia tado’o tow parisi bo tow Saduki mahi baptisên, kumua sia we silatahula : “Ei komotahula i suru i nulah dumerehe’. Siseiêm nihumua we komotahula, awahêm komotahula doro’na momorus a mboro’ ê niha-ahi? ⁸ Yanasa mamua’ange’bua’ iwêtêna’an pêtobatan. ⁹ Bo na’am dumeken, awahêm komotahula doro’na kumua a suang i natenu: Si Abraham awahêm amang i hamitahula ! Ênde ahu kumua we homotahula : Ningumêlêd do’na mawa-moali kedo-heding tanu si Abraham a mangawatu wa’i! ¹⁰ Boliung sinadiam a namut i kayu bo a sanga-sanga tud kayu ê tahi’i mehe wua’ ulit tubangên bo irupul mbaha. ¹¹ Si ahuh mabtis i homotahula i nahe maindo tanda’ i pêtobatan, sumata si Sia ê mahi lamalas be ahu ni’it moimbahut nde ahu bo siahu ahi’i iwêtêna’an lumoput i sapatu-Na. Si sia mahi maptis i homotahula i Tutuh Lênas bo i mbaha. ¹² Iwataw a kama-Nam. Si Sia mahi mêrêsi i pakomoan-A osa sumêsên i nggandum-Na a suang i nggodong, sumata’ samut i kimuan ia’ho tutun-A a mbaha ê tahi’i hawatean”. ¹³ Yana mahim si Yesus a ngGalilea moai a Yordan be si Yohanes tanu baptisêna. ¹⁴ Sumata’ si Yohanes sumukud i Sia, kuana : “Siahu ê pêrêlu baptisên-U, osa si How ê moai we ahu? ¹⁵ Osa si Yesus sumowat, kuaNa we Sia: “Mande nia’i ihamoali, apa’an kelewa’ahom tutula kita mawalêkêw i pahasa pandung i Ningumêlêd”. Bo si Yohanes kahi kumi’it i Sia. ¹⁶ Pahawaptisênoho, si Yesus tilaho i lumuai a nahe osa a norasio’ waaho hahi langit ihawuyat osa sia. Mahawilah Tutuh Lênas kele melepad mombo mekad a mbaoNa, ¹⁷ osa katanga’anange nunu’ a sorga nihumua: “Wa’im mBataKu ê nihalêKu; be Siam Ahu mêtêna’an”.